A creación literaria galega e portuguesa, a debate nas Conversas Nortear

O escritor galego Antón Riveiro e autora portuguesa Olinda Beja foron os protagonistas dunha nova sesión do ciclo de Conversas Nortear, na que Anxo Angueira actuou de moderador. O acto, desenvolvido na Facultade de Filoloxía e Tradución da Universidade de Vigo, contou tamén coa participación na presentación de Luis Alonso, decano da facultade; Cristina Rubal, subdirectora xeral de Bibliotecas da Consellería de Cultura e Educación da Xunta de Galicia; Xosé Lago, secretario do Agrupamento Europeo de Cooperación Territorial Galicia-Norte de Portugal; e Fernanda Eugénia Araújo, responsable do departamento de Dinamización e Promoción Cultural da Dirección Rexional de Cultura do Norte de Portugal.

Baixo o título ‘Galicia-Norte de Portugal: Un universo literario común?’, os autores debateron sobre a creación literaria a ambas as beiras do Miño, para ofrecer as súas perspectivas das letras galegas e portuguesas, de acordo coa finalidade do ciclo de ofrecer un achegamento á literatura da man dos seus protagonistas actuais, os autores e as autoras, nun formato de charla distendida e aberta aos asistentes.

Estes encontros culturais, promovidos pola Secretaría Xeral de Cultura en colaboración co Agrupamento Europeo de Cooperación Territorial Galicia-Norte de Portugal e a Dirección Rexional do Norte de Portugal, teñen como principal obxectivo favorecer o diálogo e o coñecemento mutuo entre as literaturas galega e portuguesa a través dos seus autores literarios e reforzar o intercambio cultural galego-portugués.

Dous autores de referencia nas letras actuais

O galego Antón Riveiro Coello (Xinzo de Limia, 1964) é un dos narradores de máis prestixio da narrativa galega actual. Traducido a varias linguas, entre as súas obras destacan os títulos Animalia, As rulas de Bakunin, Homónima, Laura no deserto ou Os elefantes de Sokúrov. Ten, entre outros, os premios Camilo José Cela, Manuel García Barros, Álvaro Cunqueiro de Narrativa, Fervenzas Literarias e o da Crítica Española.

Olinda Beja (São Tomé e Príncipe, 1946), residente desde nena na localidade portuguesa de Viseu, é unha destacada poeta, escritora e narradora. É autora de poemarios como Bô Tendê?, Leve, Leve, No País do Tchiloli, A Ilha de Izunari, ou Um grão de café: uma simples homenagem ao menino chinês do pote vazio, que foi incorporada ao Plano Nacional de Leitura de Portugal. Tamén escribiu as novelas15 Dias de Regresso e Pedra de Villa Nova. Por A Sombra do Ocá recibiu o premio literario Francisco J. Tenreiro.

Certame Nortear, para escritoras e escritores novos

Outra das iniciativas desenvolvidas no marco deste proxecto é o certame Nortear. Jovens Escritores/Mocidade Escritora Norte de Portugal-Galicia, que este ano chega á súa segunda edición. Con preto de trinta obras presentadas, o fallo do xurado farase público a finais de ano. Este premio ten o obxectivo de promover a aparición de novos escritores e escritoras, de estimular a produción de obras inéditas no ámbito da ficción e de favorecer a creatividade literaria entre a mocidade escritora residente na Eurorrexión Galicia-Norte de Portugal, así como de destacar, anualmente, obras literarias orixinais e de promover a circulación e distribución de obras literarias mais aló das fronteiras.

Iniciativas para promover o diálogo cultural

Estas actividades son froito do memorando de entendemento asinado este ano pola Consellería de Cultura e Educación, pola Dirección Rexional do Norte de Portugal e pola Agrupación Europea de Cooperación Territorial (AECT) Galicia-Norte de Portugal.

Ao abeiro deste memorando, ademais do programa de conversas literarias con autores como Ledicia Costas, Pedro Guilherme-Moreira, Ana Luísa Amaral e Ramón Caride, véñense desenvolvendo outras iniciativas como foi a mostra de fotógrafos lusos 'Oito espazos para sete miradas’, na Casa da Parra en Santiago de Compostela, e a mostra galega, ‘Santiago, cidade ilustrada’, de artistas internacionais e galegos exposta en Braga, durante o pasado ano. O intercambio de fondos bibliográficos destinados a enriquecer a sección de lingua portuguesa na Biblioteca de Galicia e de lingua galega na Biblioteca da Dirección Rexional do Norte de Portugal tamén é froito desta colaboración cultural galego-portuguesa.