O pleno do Consello da Cultura Galega destaca os vínculos co mundo lusófono

O conselleiro de Cultura, Educación e Ordenación Universitaria, Román Rodríguez, destacou, con motivo da celebración do pleno do Consello da Cultura Galega (CCG), o traballo conxunto entre administracións e institucións culturais de Galicia e Portugal para seguir afianzando os vínculos co mundo lusófono, dada a recente incorporación do organismo estatutario á Comunidade dos Países de Língua Portuguesa (CPLP).

Un fito, segundo trasladou o titular do departamento de Cultura da Xunta de Galicia, posible grazas ao apoio e colaboración da Embaixada de Portugal en España na xestión pola que, por acordo das tres partes e a proposta dos gobernos galego e español, o homólogo portugués accedeu a presentar diante da CPLP a candidatura do Consello da Cultura Galega.

Neste sentido, felicitou ao CCG pola súa incorporación a esta entidade de máximo nivel no ámbito lusófono, na que exercerá como observador consultivo en representación de Galicia. O dito ingreso foi abordado hoxe con motivo do pleno do CCG, no que se valorou a relevancia, tanto para Galicia como para a comunidade lusófona, deste novo nexo de unión co país veciño, que se suma a todas as iniciativas desenvolvidas polos dous gobernos desde a aprobación da Lei 1/2014 de aproveitamento da lingua portuguesa e vínculos coa lusofonía, xa coñecida como Lei Paz-Andrade.
Iniciativas en común

Dentro deste marco normativo, cómpre destacar a sinatura, en febreiro de 2015, do memorando de entendemento, ao abeiro do que a administración educativa galega, en colaboración co Instituto Camoês, incorporou o portugués como lingua estranxeira de opción e avaliación curricular no ensino non universitario.

Entre outros asuntos, tamén destacan senllos memorandos de entendemento en materia de deporte (asinado en marzo de 2015), cultura (asinado en abril de 2015), relacións económicas (pesca, medio ambiente e turismo, asinado en xaneiro de 2016); así como a candidatura acadada no marco do Programa INTERREG V-A, España-Portugal (POCTEP 2014-20) que presentou a Axencia para a Modernización Tecnolóxica de Galicia (Amtega) para a recolección e difusión do patrimonio colectivo da Eurorrexión Galicia-Norte de Portugal, en virtude da que se impulsou a nova versión traducida ao portugués do Diario Oficial de Galicia.