Santiago é a sede estes días da Conferencia anual da Asociación internacional de Estudos Rexionais

Medio milleiro de especialistas en Ciencia Rexional de todo mundo reúnense estes días na Facultade de Xeografía e Historia da USC para asistir á Conferencia Anual da Regional Studies Association, que esta mañá inauguraron o conselleiro de Cultura, Román Rodríguez, e o vicerreitor de Investigación, Vicente Pérez.

A organización local coordínaa María José Piñeira Mantiñán, do Grupo de Investigación ANTE (USC), para quen esta cita científica supón “unha oportunidade de contacto, colaboración e traballo conxunto co obxectivo de empuxar as rexións máis alá dos seus límites, que poden ser entendidos como físicos, pero tamén como mentais e disciplinares”.

No encontro debátese sobre economía global, comercio, fluxos financeiros e políticas de desenvolvemento rexional, pero tamén sobre cuestións candentes na actualidade como nacionalismo xeopolítico, federalismo e rexionalismo, economía da identidade, fronteiras e cooperación transfronteiriza. Ademais, preséntanse comunicacións sobre benestar, habitabilidade, vulnerabilidade, resistencia, sustentabilidade, cambio climático, medio ambiente e enerxía desde unha perspectiva rexional.

O Grupo de Investigación ANTE (Análise Territorial) que organiza a Conferencia está formado por xeógrafos, economistas, historiadores e arquitectos e ten o recoñecemento de Grupo de Excelencia Investigadora polo seu dinamismo e o seu programa de internacionalización, ademais de pola súa ampla experiencia en xestión e difusión de I+D e na organización de congresos internacionais.