O presidente do Tribunal Superior de Xustiza de Galicia entrega a Manuel Fraga a Memoria de Actividades de 2004

O presidente do Tribunal de Xustiza de Galicia (TSXG), Xesús Souto Prieto, entregou ao xefe do Executivo galego a memoria de actividades de 2004. O presidente da Xunta, Manuel Fraga, recibiuno no seu despacho de San Caetano, e trala xuntanza, felicitouno polo “funcionamento verdadeiramente satisfactorio da Xustiza en Galicia “a pesar das restriccións económicas que chegan de Madrid”.

Así mesmo, o titular do Goberno galego agradeceu o xesto de Souto Prieto de achegarlle o reconto do “funcionamento do Alto Tribunal e de todos os xulgados de todos os Tribunais de Galicia” durante o ano 2004.

Segundo manifestou o presidente do TSXG, tamén presentará esta memoria ante a Presidencia do Parlamento de Galicia “por consideralo, non só un deber de cortesía senón unha necesidade de colaboración institucional”, na súa calidade de máximos representantes do “poder Executivo e Lexislativo en Galicia”.

DEFENSA DA LEXISLACIÓN AUTONÓMICA

Xesús Souto Prieto lembrou que os Tribunais Superiores “están moi imbricados nas Comunidades Autónomas”, aínda que “seguen sendo órganos estatais”. Así, explicou que estes organismos “están contemplados nos Estatutos de Autonomía e están pensados como herdeiros das antigas Audiencias Territoriais e das Reais Audiencias para defender a lexislación da Comunidade Autónoma”.