Bota a andar a quinta edición do programa ‘Unha enxeñeira ou científica en cada cole’

Esta iniciativa impulsada dende a Oficina de Igualdade de Xénero (OIX) da USC e no marco do convenio de colaboración que neste eido mantén a Universidade co Concello de Santiago de Compostela, está dirixida ao alumnado dos Centros de Educación de Infantil e Primaria públicos do Concello nos meses de setembro a outubro. Esta quinta edición do programa tenta motivar a presenza de rapazas nas titulacións relacionadas coas denominadas disciplinas STEM, isto é, ciencia, enxeñería, tecnoloxía e matemáticas; e “caracterizadas por unha preocupante baixa presenza de alumnas”, apuntan dende a OIX.

Dadas as circunstancias da pandemia da COVID-19, os obradoiros foron reformulados en modalidade virtual a través de webinars, vídeos e materiais didácticos diversos. No programa participan nenas e nenos de cuarto, quinto e sexto de primaria do CEIP López Ferreiro, CEIP Mestre Rodríguez Xixirei, CEIP Raíña Fabiola e CEIP de Vite I.

Programa

Tamén no CEIP López Ferreiro, impartirase o obradoiro ‘Coas mates pódense gardar segredos’, o cal correrá a cargo de Elena Vázquez Abal, profesora da Área de Xeometría e Topoloxía da USC, os días 30 de setembro e 1 de outubro. A profesora impartirá este mesmo obradoiro no CEIP de Vite I e no CEIP Raíña Fabiola os días 8 e 9 de outubro. O CEIP Mestre Rodríguez Xixirei acollerá o 5 de outubro o taller ‘Falando cos superordenadores’, impartido por Mª José Rodríguez Malmierca e Natalia Costas, investigadoras do CESGA. O mesmo taller desenvolverase no CEIP Raíña Fabiola o 5 de outubro. Finalmente, no CEIP de Vite I, o 7 de outubro, impartirase o taller ‘Xogando coa luz’, impartido por Maite Flores Arias, profesora da Área de Óptica da USC.