O Centro Ramón Piñeiro publica 'Lírica galego-portuguesa. Lingua, sociolingüística e pragmática'

O secretario xeral de Política Lingüística, Valentín García, participou este mediodía, no salón de actos do Pazo de San Roque, na presentación da nova publicación en liña do Centro Ramón Piñeiro para a Investigación en Humanidades (CRPIH), Lírica galego-portuguesa. Lingua, sociolingüística e pragmática.

Valentín García quixo poñer en valor o traballo do CRPIH arredor da lírica medieval galega a través de proxectos como Lírica profana galego-portuguesa, Cantigas de Santa María, Prosa literaria galega medieval ou Bibliografía de Referencia do Arquivo Galicia Medieval, “dos que esta publicación é tamén un froito”. Así mesmo, explicou que a publicación en liña do libro Lírica galego-portuguesa. Lingua, sociolingüística e pragmática“ permite o acceso universal e gratuíto ao saber xerado neste centro de investigación da Xunta de Galicia”.

Xunto co secretario xeral de Política Lingüística, participaron na presentación o coordinador científico do Centro Ramón Piñeiro, Manuel González, e a directora da publicación, Déborah González.

Monografía a cargo de oito especialistas nos estudos medievais

Lírica galego-portuguesa. Lingua, sociolingüística e pragmática é o segundo volume da serie de publicacións ArGaMed (Arquivo Galicia Medieval), iniciada co volume dixital O Códice de Florencia das Cantigas de Santa María (B.R. 20). Transcrición paleográfica (Elvira Fidalgo e Antonio Fernández, 2019) e destinada a difundir estudos ou edicións críticas ou paleográficas relacionadas cos proxectos medievalistas do CRPIH.

Trátase dunha monografía dedicada á lírica que reúne oito capítulos a cargo de especialistas consagrados nos estudos medievais como son Xosé Bieito Arias Freixedo, Mercedes Brea, Ângela Correia, Charmaine Lee, Simone Marcenaro, Henrique Monteagudo, Maria Ana Ramos e Gema Vallín. Os seus artigos abordan aspectos como a formación da tradición manuscrita galego-portuguesa a partir do recoñecemento de estratos (scripto) lingüísticos diferentes; a circulación dunha antoloxía de cantigas medievais en época posterior ao movemento trobadoresco a partir do exame da localización e autoría das composicións ‘espurias, de incorporación máis recente; os problemas de atribución no cancioneiro galego-portugués; a produción trobadoresca galego-portuguesa desde unha perspectiva sociolingüística; a avaliación de usos e expresións concretas en relación co xénero lírico e o uso do galego nunha das máis célebres composicións plurilingües do período trobadoresco.

O volume completo pode descargarse na páxina do CRPIH, así como na libraría institucional da Xunta de Galicia.