Skip to main content

A Aula de teatro universitaria do campus de Pontevedra preséntase en sociedade na Miteu viguesa

O Teatro Vidal Bolaño do campus vigués foi así testemuña da primeira actuación da agrupación pontevedresa, que este xoves volverá representar a mesma obra no marco da Miteu de Pontevedra, a partir das 21.00 horas no Pazo da Cultura con entrada de balde.

Cun elenco composto por trece persoas a peza arranca co encontro duns exiliados nun espazo e tempo indeterminado e, a partir de aí, van reconstruíndo o seu pasado lembrando os feitos que aconteceron en Nosa Señora das Nubes, a vila natal de ambos.

Hoxe xoves, Emigrados da man da Aula de teatro do campus de Vigo

A vixésimo cuarta edición da Miteu en Vigo continúa hoxe xoves ás 18.30 h coa actuación da Aula de teatro do campus de Vigo, que representará a obra Emigrados, unha proposta baseada nos textos de Anxos Sumai, Cándido Pazó, Sonia Torre, Suso de Toro e Xosé Manuel Pazos.

Dirixida por Casilda Alfaro e Sonia Rúa, esta é unha historia múltiple que, engarzada, constitúe un mosaico de pezas dos distintos autores e autoras que dende o tratamento específico da migración, do retorno, do desarraigamento, compoñen un cadro xeral que permite apreciar o drama individual e social que supón estoutro xeito de “exilio”.

Como explican dende a propia aula de teatro, “estamos a falar dun drama social (dende a suma de moitos dramas individuais) pero, aínda así, queremos trasladalo dende fóra do laio, dende a axilidade da linguaxe contemporánea, dende a ironía como vehículo de expresión (unha das formas máis sutís de ‘crueldade’) e sobre todo dende a ‘proximidade’, do achegamento a calquera espectador contemporáneo. Porque non se trata de facer un relatorio de sufrimentos e agravios, senón de falar dende hoxe de algo que fai parte da existencia de case todos os galegos e galegas de xeito individual e de todas e todos dende o punto de vista da conciencia colectiva”.

A próxima semana, outra dobre cita co teatro no campus de Vigo

A Miteu viguesa despedirase dos escenarios ata o vindeiro ano a próxima semana, e farao con dúas novas propostas de fóra de Galicia. O día 4 a cita será coa compañía portuguesa Circulo de Iniciaçao Teatral da Academia de Coimbra, que representará a obra CaosTM, mentres que o pano desta edición baixarase o día 5 coa Aula de Teatro da Universidad Pública de Navarra, con Arrabaladas.
Universidade de Vigo