Skip to main content

O festival Resis 2022 clausura a súa quinta edición posicionando á Coruña como un referente da música contemporánea

Entre os músicos que participaron nesta edición inclúense artistas como Quartet Gerhard, Marc Vilanova, Lab.51, Arxis Ensemble, a Camerata da Orquestra Sinfónica de Galicia ou a Banda Municipal da Coruña. Artistas de referencia mundial como o grupo Cantando Admont ou o compositor Beat Furrer tamén formaron parte da programación do concerto. Ademais, varios concertos estiveron incluídos dentro do ciclo-homenaxe ao compositor Iannis Xenakis, peza clave da música contemporánea do seculo XX.

Os espazos tamén foron moi significativos nesta edición. Así, o Festival RESIS inundou de música lugares como a Igrexa das Capuchinas, o Museo de Belas Artes, o Castelo de San Antón, a Fundación Luis Seoane, a Igrexa de Santiago ou a DOMUS.

Dende a organización do Festival RESIS destacan que un ano máis, a maioría dos concertos esgotaron as entradas días antes da súa celebración. Un dato que certifica o interese do público galego pola música contemporánea.

Ademais, no sector da música contemporánea, o Festival RESIS posicionouse como un referente entre as publicacións especializadas. A Coruña foi durante estes meses o punto de encontro de críticos e especialistas na materia.

Alén das citas musicais, o Festival RESIS programou tamén mesas redondas, máster class en colaboración co Conservatorio de Música da Coruña e xornadas sobre a música contemporánea. A inclusión tamén estivo presente nesta edición, cun proxecto didáctico para persoas con discapacidade auditiva. Por último, presentáronse dúas instalacións sonoras, de Marc Vilanova e de Igor C. Silva xunto a Arxis Ensemble.
Festival Resis 2022