Skip to main content

72 rapaces galegos residentes no exterior participan na primeira quenda de campamentos de verán da Xunta de Galicia

Setenta e dous de orixe galega residentes no exterior volven a Galicia para participar na primeira quenda de campamentos de verán que, coma tódolos anos, organiza a Xunta de Galicia.

Nesta primeira quenda, que vai do 1º de xullo ata o día 15 do mesmo mes, participan rapaces chegados de Arxentina, Uruguai e outras comunidades autónomas españolas. Os beneficiarios deste programa posto en marcha polo departamento que dirixe Aurelio Miras Portugal rotarán, durante estas dúas semanas, entre os campamentos de R.X. Eijo Garay, en Lugo; Altamar, en Vigo; e Cuevillas, en Ourense, onde poderán compartir unha quincena de lecer e actividades lúdico-deportivas..

RECEPCIÓN DOS PARTICIPANTES

65 mozos chegarán desde a Arxentina e Uruguai ó Aeródromo compostelán da Lavacolla ás 11:10h, no voo de Iberia IB-546; deles, 30 proceden da República Austral e os outros 35 da veciña terra uruguaia. Outros 7 mozos proceden de centros de distintas comunidades autónomas españolas.Para a maioría deles, o programa de acampamentos de verán é a súa primeira oportunidade de coñecer Galicia e ós familiares que aínda teñen nestas terras. Como xa é tradición, moitas destas familias achegaranse ó aeródromo compostelán para saluda-los rapaces antes de que viaxen ós albergues de destino.

Este programa busca inserir na vida social e cultura de Galicia a rapaces de entre 14 e 20 anos, fillos ou netos de galegos emigrados. Rotando entre albergues xuvenís das catro provincias, de mar montaña e cidade, facendo excursións, participando en actividades culturais, deportivas e de lecer, estes mozos de ascendencia galega redescubren as súas raíces, fortalecendo a súa vinculación co seu país, e cimentando cara ó futuro a identidade común que posúen gracias á convivencia con outra xente nova galega da mesma idade.


Gabinete de Comunicación da Consellería de Emigración da Xunta de Galicia