Skip to main content

As industrias culturais galegas viaxan a Arxentina en misión comercial ao Micsur

O conselleiro de Cultura, Educación e Ordenación Universitaria, Xesús Vázquez Abad, salientou o avance no plano da internacionalización das industrias culturais galegas que suporá a presenza dunha activa delegación empresarial, institucional e artística no Mercado de las Industrias Culturales del Sur (MICSUR), que se desenvolverá na cidade arxentina de Mar del Plata do 15 ao 18 de maio.

Vázquez Abad presentou os detalles da misión comercial e da participación galega na primeira edición deste mercado internacional, que reúne os dez países latinoamericanos integrantes de Mercosur, nun acto levado a cabo na Cidade da Cultura de Galicia, no que estivo acompañado polo director da Agadic (Axencia Galega das Industrias Culturais), Jacobo Sutil, e polos artistas Uxía, Budiño, Narf e Rosa Cedrón, protagonistas do concerto Atlántic@s que se estreará en Arxentina.

O titular de Cultura e Educación explicou a importancia que para o proceso de proxección exterior e comercialización da produción cultural galega implicará desembarcar en MICSUR cunha ampla misión comercial promovida e coordinada desde a Xunta de Galicia, na que figuran nove empresas galegas dos distintos ámbitos culturais (a meirande parte delas presentes no acto de hoxe), ademais da Agadic, Artesanía de Galicia e Televisión de Galicia.

Especial transcendencia

Destacou, ademais, que a participación de Galicia en MICSUR enmárcase na política de promoción exterior continuada ao longo de todo ano desde a Consellería respecto a presenza da cultura galega nas principais feiras sectoriais internacionais especializadas. Neste sentido, remarcou a especial transcendencia desta nova acción porque Galicia recibirá en MICSUR un trato preferente e gozará de pleno dereito á hora de propiciar acordos conxuntos destinados á circulación de bens e servizos culturais na extensa rexión xeográfica de América do Sur que compoñen Arxentina, Bolivia, Brasil, Chile, Colombia, Ecuador, Paraguai, Perú, Uruguai e Venezuela.

Recordou tamén que esta misión é consecuencia dos acordos tomados durante a celebración o pasado novembro de MICAtlántica (Mercado das Industrias Culturais Atlánticas) en Santiago, polo que, con este novo encontro, se brinda a oportunidade de proseguir co desenvolvemento dos 11 acordos de natureza pública e os máis de 20 de carácter privado xurdidos en Compostela.

O seguinte paso neste proceso será a celebración o ano que vén, de novo na capital, de Galicia de MICAtlántica 2015, edición que será presentada en Mar del Plata dentro do programa oficial de MICSUR dirixido a todos os acreditados no encontro.

Expresamente convidadas

Outra das particularidades da presenza comercial galega en MICSUR é que as empresas que viaxan a Mar del Plata o fan convidadas expresamente pola organización do evento, debido ao establecemento previo de relacións bilaterais positivas e ao desenvolvemento de proxectos concretos xa en marcha. Así, acudirán a MICSUR representantes das compañías Altafonte, Galaxia, Ficción Producións, Imaxin Software, Mare Producións, Nalgures, Planeta Noema, Sun Lúa e Teatro Galileo.

Vázquez Abad referiuse a este colectivo como “unha delegación empresarial que aglutina referentes das nosas industrias culturais”, por reflectir “tanto iniciativas sobranceiras da nosa cultura e proxectos empresariais altamente innovadores, como representantes do noso talento e creatividade en eidos como o editorial, o das artes escénicas, a música ou o audiovisual”.

A composición da delegación adecúase así á propia estrutura temática do MICSUR, a mesma clasificación utilizada no orixinal MICA (Mercado de Industrias Culturales Argentinas) e no MICAtlántica, que divide os seus contidos de exhibición e de relación comercial en cinco grandes áreas: Artes Escénicas, Audiovisual, Deseño/Artesanía, Editorial, Música e Videoxogos.

Para facilitar o desprazamento destas empresas a MICSUR, onde levarán a cabo unha intensa axenda de reunións dentro do apartado de Roldas de Negocios, a Consellería publicou recentemente, a través da Agadic, unha convocatoria específica de subvencións.

Atlántic@s

O colofón da presenza galega en MICSUR será a noite dedicada á música de Galicia, que terá lugar na sinalada data do 17 de maio, Día das Letras Galegas. O Teatro Colón de Mar del Plata acollerá o espectáculo ‘Atlántic@s’, baixo a dirección artística da cantante Uxía Senlle, e no que participarán tamén Rosa Cedrón, Xosé Manuel Budiño e Fran Pérez ‘Narf’.

O conselleiro de Cultura agradeceulles a súa colaboración e cualificou os catro artistas de “selecto monllo de cantantes e intérpretes, donas e donos de estilos de seu, diversos e complementarios”. Apuntou tamén que Atlántic@s é un concerto pensado e deseñado especialmente para o foro MICSUR e o que este mercado representa: “comuñón de persoas e pobos irmandados pola historia, asociados por idiomas e intereses comúns, que conciben a cultura como piar do desenvolvemento, e cunha visión de futuro asentada na cooperación territorial para un progreso económico e social sustentable”, dixo.

Atlántic@s alternará a interpretación conxunta de temas por parte de Uxía, Rosa Cedrón, Budiño e Narf co repertorio de cada un dos artistas participantes para dar como resultado un espectáculo único, que está a ser ensaiado este días na sede da SGAE en Santiago.

O concerto repetirase o día seguinte, 18 de maio, no Teatro Sha de Bos Aires, onde todos os arxentinos seguidores da nosa música e, especialmente, a comunidade galega, poderá gozar desta proposta.

Xesús Vázquez Abad rematou a súa intervención transmitíndolle os seus parabéns á nova ministra arxentina de Cultura, Teresa Adelina Sellares ‘Teresa Parodi’, que tomou onte posesión do seu cargo en Bos Aires.
Gabinete de Comunicación da Xunta de Galicia