Skip to main content

O IV Festival peregrinos musicais promove os novos talentos galegos e rusos

As novas promesas musicais de Galicia e de Rusia son as protagonistas do IV Festival Internacional Peregrinos Musicais, que do 21 ao 26 de setembro ofrece concertos e encontros líricos gratuítos en diversos escenarios de Santiago de Compostela e en Lugo. A Asociación Peregrinos Musicais, co apoio da Consellería de Cultura, Educación e Ordenación Universitaria, promove este festival de música clásica, dedicado á promoción dos novos talentos.

Na presentación da programación da nova edición, que tivo lugar en Santiago de Compostela, o secretario xeral de Cultura referiuse á iniciativa como unha oportunidade de preparación conxunta entre músicos novos de distintas procedencias, que contribúe ao intercambio cultural e tamén educativo. Así mesmo, destacou a importancia de favorecer a creación de espazos para a promoción da música e da mostra pública do traballo dos artistas novos.

A presentación tamén contou coa intervención da concelleira de Cultura de Santiago, María Antón, e da directora artística do festival, Ilona Timchenko, quen sen encargou de detallar a programación.

Un total de doce músicos, seis prodixios musicais galegos e seis novas estrelas rusas procedentes das prestixiosas fundacións de música clásica Rostropóvic e Spivákov, foron os seleccionados para participar como intérpretes na nova edición do festival. Do ámbito galego, participan no festival Cristina Bernal (piano), Ignacio da Vila (clarinete), Nerea Rodríguez (acordeón), Noa Outomuro (soprano), Pablo Rouco (frauta) e Roberto Bolaño (frauta). Os intérpretes rusos da cuarta edición son Anastasia Chichelova (piano), Uliana Zhivitckaia (frauta), Chingis Khannánov (violín), David Kcrikuli (piano), Daniel Lozakovitj (violín) e María Zaitseva (violonchelo).

Concertos e encontros

A capital de Galicia acollerá en catro dos seus escenarios estas prometedoras figuras da música clásica. Ademais, os peregrinos musicais tamén visitarán este ano Lugo. O concerto inaugural terá lugar o vindeiro 21 de setembro, ás 20 horas, no Teatro Principal de Santiago de Compostela. O día 23, a Casa do Saber de Lugo acollerá, á mesma hora, un encontro no que os músicos participantes no festival contarán as súas experiencias e as súas vivencias durante o transcurso dos concertos, ademais de interpretar algunha obra mestra.

O festival trasladarase o mércores 24 de setembro, ás 21 horas, a un escenario único como é a Catedral de Santiago, onde os doce talentos invitados poderán gozar e compartir a súa excelencia dentro da música clásica. O cuarto concerto do festival será ao día seguinte na Cidade da Cultura de Galicia, que albergará, ás 20:30 horas, outro encontro de música clásica no que se interpretarán grandes obras mestras.

A clausura da cuarta edición do festival, que terá lugar o día 26 ás 21 horas, contará coa Real Filharmonía de Galicia, baixo a dirección do mestre Maximino Zumalave, que acompañará sete solistas na que será nunha oportunidade única de escoitar as promesas da música clásica máis destacadas.

Promoción dos novos artistas

Creada en 2011 da man da pianista rusa Ilona Timchenko, a Fundación Peregrinos Musicais ten como obxectivo a promoción das mozas e dos mozos artistas de Galicia. Deste xeito, nace o Festival Internacional Peregrinos Musicais, co fin de realizar actividades conxuntas e de intercambio con músicos importantes e de gran prestixio internacional.

A Consellería de Cultura e Educación vén apoiando o Festival Internacional Peregrinos Musicais para contribuír a lles dar un soporte aos novos talentos da interpretación, espírito co que nace seguindo a idea orixinal da fundación Vladimir Spivákov. O fin de Peregrinos Musicais é presentarlle ao público estes mozos e mozas, músicos e virtuosos intérpretes. Veno facendo desde o 2011, ano no que se organizou o primeiro encontro entre estes músicos talentosos de Galicia e doutros países estranxeiros, no marco da celebración do ano España-Rusia.
Gabinete de Comunicación da Xunta de Galicia