Skip to main content

Investiranse 37.000 euros na restauración do retablo de San Ildefonso, en Iria Flavia

O conselleiro de Cultura, Educación e Ordenación Universitaria, Xesús Vázquez Abad, visitou a Igrexa de Santa María a Maior de Iria Flavia, onde anunciou que o seu departamento ten previsto investir neste ano 37.000 euros na restauración do retablo de San Ildefonso da Capela do Bispo de Quito. O obxectivo é poñer en valor unha das pezas máis relevantes desta igrexa, pola que pasa o Camiño Portugués e que ten a consideración de Ben de Interese Cultural (BIC) e, polo tanto, merece a maior protección no ámbito do patrimonio. A Consellería ten previsto adxudicar nas próximas semanas a restauración, que ten un prazo de execución -incluído o proxecto- de 5 meses.

Segundo explicou o conselleiro, a intervención irá dirixida a resolver as patoloxías que presenta na actualidade este retablo barroco —obra de Mateo de Prado—, que representa na súa escena principal a imposición da casulla a San Ildefonso. Para iso elaboraranse mapas de estado de conservación e limparanse as pezas, eliminando os elementos alleos e aplicándolles tratamentos de desinsectación curativo-preventiva e colocando barreiras antitermes. Así mesmo recuperarase a estrutura do retablo e da súa predela —que alberga o sagrario— e realizaranse tarefas de fixación da policromía, coa aplicación dun verniz final de protección.

Durante a súa visita á Igrexa de Santa María a Maior de Iria Flavia, na que estivo acompañado polo alcalde de Padrón, Antonio Fernández Angueira; o conselleiro comprobou ademais o resultado das melloras realizadas no retablo da Capela do Sagrario e na imaxe da Virxe de Belén deste mesmo templo. A actuación, que asumiu a parroquia cun orzamento de arredor de 40.000 euros, consistiu na limpeza e eliminación de repintados das pezas, así como na reintegración formal e cromática das mesmas, que quedaron tamén protexidas por unha capa final de verniz.

Ben de interese cultural

A igrexa parroquial de Santa María a Maior de Iria Flavia, con consideración de BIC, ten unha grande importancia no patrimonio cultural galego tanto pola súa situación- nun punto no que existiu unha mansión romana pertencente á vía XIX —que comunicaba Braga con Astorga por Tui—; como pola súa antigüidade, sendo xa no século V primitiva sé episcopal de Iria e, posteriormente, colexiata. A súa actual estrutura data de comezos do XVIII.

Entre as obras máis salientables que alberga o templo atópase a Capela do Bispo de Quito, Alonso de la Peña e Montenegro, natural de Padrón, que fora cóengo en Iria; o sepulcro do arcebispo Rodrigo de Luna; o retablo da Capela Maior e o cadeirado do coro, ambos obra de Miguel de Romay, o tallista máis prestixioso da época. No exterior da igrexa destaca a estrutura en chanzos das torres.

Cómpre sinalar que a Consellería de Cultura e Educación xa ten desenvolvido outras actuacións para a posta en valor deste templo. Non en balde, o órgano de Santa María a Maior, de tipo barroco ibérico, foi un dos participantes na rolda pola paisaxe organística galega organizada pola Consellería a través do ciclo Espazos Sonoros o pasado ano.
Gabinete de Comunicación da Xunta de Galicia