A Xunta expresa o seu máis profundo pesar polo pasamento do motorista galego Daniel Rivas e do valenciano Bernat Martínez

A Xunta de Galicia quere expresar o seu máis profundo pesar polo pasamento do piloto galego Daniel Rivas e do valenciano Bernat Martínez. Ámbolos dous motoristas perderon a vida na madrugada do 20 de xullo nun accidente múltiple no circuíto californiano de Laguna Seca (EE.UU) durante unha proba do Campionato MotoAmérica de Superbike/Superstock 1000.

Ante este tráxico suceso, o Goberno galego traslada todo o seu apoio e agarimo aos familiares e amigos dos mozos falecidos e pon en valor a contribución ao deporte de Rivas e de Martínez.

Daniel Rivas, un moañés internacional

Daniel Rivas, nacido en Moaña o 13 de marzo de 1988, era un habitual deste tipo de probas e recentemente xa participara en campionatos internacionais. De feito, a súa paixón polo motociclismo levouno a competir en eventos de renome como o Campionato Europeo de Superstock 600, a Copa do Mundo de Superstock 1000 e o Campionato do Mundo de Moto2.