Skip to main content

Notas

  • O congreso 'Retos do cambio climático: impactos, mitigación e adaptación' botou a andar en Santiago de Compostela. Este foro, organizado conxuntamente por USC e UVigo, constitúe a edición número doce do congreso da Asociación Española de Climatoloxía (AEC). Ata o venres 21, a xuntanza conformará un espazo de referencia para o intercambio, debate científico e difusión sobre as ciencias atmosféricas e, particularmente, o cambio climático.
  • O Grupo de Estudos de Arqueoloxía, Antigüidade e Territorio (GEAAT) da Universidade de Vigo acaba de finalizar unha nova intervención arqueolóxica na 'cibdá' de Armea, no concello ourensán de Allariz. Desde mediados do mes de setembro, un equipo de seis persoas estivo traballando na ampliación da zona escavada, descubrindo 300 novos metros cadrados deste xacemento de orixe romana, ocupado arredor do século I despois de Cristo e abandonado no III.
  • As facultades de Bioloxía, Ciencias, Física, Matemáticas, Química e a Real Academia Galega de Ciencias, con motivo da celebración da festividade de San Alberte Magno, organizan a IX edición do concurso ‘A Ciencia en imaxe’. O certame conta con dúas categorías, fotografía e vídeo divulgativo, sempre que o contido estea relacionado coas Ciencias, como por exemplo, os seus conceptos fundamentais, científicos/as, fenomenoloxía, aplicacións tecnolóxicas, ou temas de investigación, entre outros.
  • Santiago de Compostela converteuse este luns 17 de outubro na capital mundial da Xeografía ao acoller, no Colexio de Fonseca, a reunión do comité executivo da Unión Xeográfica Internacional da que é vicepresidente o catedrático da USC, Rubén Lois. O reitor Antonio López mantivo unha xuntanza previa ao acto cos representantes desta asociación asesora da UNESCO e da ONU en diversos ámbitos.
  • O programa do II Foro Pensando en Educación organizado polo Concello da Coruña e a Universidade da Coruña retoma as conferencias, logo da pausa do verán, o vindeiro 25 de outubro coa presenza da escritora Inma Chacón. O Paraninfo da Reitoría da UDC, na Maestranza, acollerá ás 19:30 horas a intervención de Chacón “Escribir ensinando, ensinando a escribir”
  • Un congreso internacional e, arredor del, múltiples actividades culturais, desde unha exposición ata recitais poéticos, pasando por un ciclo de cinema, unha performance e unha instalación artística. Así celebrará a Universidade de Vigo o centenario do nacemento do premio Nobel José Saramago. Será do 26 ao 29 de outubro en distintos puntos da cidade de Vigo, entre eles o Centro de Visitantes do Parque Nacional Illas Atlánticas de Galicia e o Instituto Camões
  • Investigadores da Escola Politécnica Superior de Enxeñaría do Campus Terra da USC cítanse o vindeiro 23 de outubro no Courel para abordar sobre o terreo a problemática dos incendios, ademais de para analizar e propoñer alternativas e oportunidades de futuro para a ampla extensión da serra courelá que asolada polas lapas o pasado mes de xullo.
  • USC e UNICEF España realizaron un estudo sobre o impacto da tecnoloxía na adolescencia, que aplicou escalas validadas internacionalmente para o estudo do benestar emocional e o risco de depresión. Cunha mostra de máis de 40.000 adolescentes entre os 11 e os 18 anos, a investigación constatou que o 15% de adolescentes presenta síntomas graves ou moderadamente graves de depresión. Ademais, a taxa de ideación suicida sitúase no 10,8%, o que evidencia a necesidade de definir políticas públicas que actúen neste eido.
  • O espazo cultural da Universidade da Coruña, NORMAL (Campus de Riazor), acolle desde o venres 14 de outubro, a exposición 'A Galicia deseñada', unha proposta de viaxe pola historia do deseño galego elaborada a partir dunha selección de cen símbolos, marcas e identidades gráficas. A Galicia deseñada é o resultado dun proxecto de investigación que busca poñer en valor e dar a coñecer o deseño realizado en Galicia.
  • Dúas son as xornadas que proximamente se celebrarán en ou desde a Facultade de Historia do campus de Ourense. Por unha banda, os días 13 e 14 de outubro terán lugar, de xeito virtual, as Xornadas de Historia Contemporánea e do Tempo Presente, que nesta ocasión centraranse na transición democrática. Por outra banda, o día 17 será a quenda da V xornada Olladas á Antigüidade, que nesta edición ten por temática Violencia no universo feminino.