Skip to main content

Notas

  • Alumnado de terceiro curso do grao en Educación Infantil da USC está a crear recursos educativos e lúdicos en formato audiovisual destinados aos máis pequenos da casa. Baixo o cancelo #NósXogamosNaCasa, as pezas son subidas a YouTube onde xa contan con centos de subscritores e superaron as 13.000 visualizacións. Baile, fogar, mímica, pintura, desinhibición, equilibrio, comunicación non verbal, relaxación, respiración, dramatización e ritmo son algúns dos temas desenvolvidos polo alumnado.
  • O Instituto de Seguridade e Saúde Laboral de Galicia (Issga), elaborou e distribuíu aos sectores produtivos material específico con recomendacións para a prevención ante o coronavirus no comercio debido a súa reapertura, con cita previa, en establecementos de menos de 400 metros cadrados. A documentación recolle medidas a ter en conta antes de ir traballar, como identificar ás persoas sensibles, non acudir en caso de febre ou síntomas respiratorios ou facer desprazamentos, preferentemente de xeito individual.
  • Os grupos de investigación Procesos Cognitivos e Conduta e Underisk da Facultade de Psicoloxía da USC botan a andar o proxecto ConVIDa-20, un estudo en liña sobre os efectos psicolóxicos e sociais que está a provocar a COVID-19 en estudantes de universidade. O obxectivo desta nova liña de traballo pasa por recrutar unha gran mostra de participantes para axudar a comprender os efectos do coronavirus e as medidas de distanciamento social na súa saúde e benestar.
  • A Axencia para a Modernización Tecnolóxica de Galicia (Amtega) vén de notificar formalmente á Comisión Europea a iniciativa autonómica para a mellora de cobertura móbil en zonas illadas. Este trámite dá continuidade ao intercambio de información levado a cabo nos últimos meses para acadar a aprobación previa por parte da Comisión Europea e, deste xeito, poder levar a cabo os investimentos públicos previstos para a mellora das redes de telefonía móbil nas zonas rurais.
  • A Xunta pon a disposición da cidadanía unha ferramenta dixital que permite medir e comprobar a lonxitude dos novos desprazamentos autorizados polo Goberno. A través do visor básico na web de información xeográfica de Galicia, o <u><a href="http://mapas.xunta.gal/visores/basico/" target="_blank">Instituto de Estudos do Territorio (IET)</a></u>, en colaboración coa Axencia para a Modernización Tecnolóxica de Galicia, ofrecen aos cidadáns a posibilidade de calcular con precisión o radio no que poden desprazarse e planificar así as súas saídas.
  • A busca de determinantes xenéticos e biomarcadores xenómicos de risco que podan predispor a sufrir unha infección a causa do virus SARS-CoV-2 máis grave, ou que mesmo podan causar a morte en persoas aparentemente sen factores de risco asociado, é o principal obxectivo da investigación dirixida polo catedrático da USC, responsable do grupo de Medicina Xenómica e director da Fundación Pública Galega de Medicina Xenómica do SERGAS, Anxo Carracedo.
  • O secretario xeral para o Deporte participou nunha reunión virtual convocada pola Unión de Federacións Deportivas Galegas (Ufedega) e na que participaron un total de 42 das 58 entidades federativas do deporte galego. Nas súas verbas, o secretario xeral para o Deporte lembrou aos presidentes que a Xunta traballa nun Plan de Continxencias en coordinación coas federacións e coa participación de expertos, para planificar o futuro da actividade física e o deporte en Galicia.
  • O director do Observatorio Astronómico Ramón María Aller da USC, José Ángel Docobo, explica que o obxecto voador avistado este martes desde Galicia corresponde a unha das fases do foguete ruso lanzado para levar carga á Estación Espacial Internacional (EEI). O catedrático da USC fixo estas declaracións logo das preguntas achegadas por diversos medios de comunicación para intentar explicar a espectacular imaxe dun voluminoso obxecto luminoso, unha escena gravada en vídeo e que pronto espertou todo tipo de polémicas nas redes sociais.
  • Boa acollida para a inauguración de Aula Galicia Aberta, o novo programa posto en marcha pola Secretaria Xeral de Emigración, que foi seguido na súa primeira clase por máis de 10.000 galegos a través de Facebook live . A sesión de canto e pandeireta impartida por Leni Pérez, formada por unha parte formativa e divulgativa e unha titoría inmediatamente posterior, recibiu nas primeiras horas desde a súa emisión máis de 2.000 interaccións e preto dun milleiro de comentarios.
  • Máis de 1500 persoas aprenden galego durante estas semanas a través do cursos en liña que ofrece a Xunta de Galicia no marco do Plan de Teleformación en Lingua Galega para o ano 2020 para residentes tanto na Comunidade como noutras zonas. Un total de 1080 alumnos seguen, ata o 8 de maio e baixo a titorización de profesorado específico, un total de 34 cursos preparatorios das probas de acreditación do Certificado en Lingua Galega (Celga).