Skip to main content

Notas

  • Xa está dispoñible para descarga a aplicación móbil que permitirá seguir os datos de participación e o avance en directo do escrutinio das eleccións ao Parlamento de Galicia que se celebran o próximo domingo, 12 de xullo. Pode instalarse desde os markets de Android e iOS. Ademais, os mesmos datos estarán tamén dispoñibles na web resultados2020.xunta.gal, que estará operativa o próximo domingo.
  • Os novos valores do cine lugués déronse cita no auditorio municipal Gustavo Freire no marco da gala do V Findecurta, un maratón audiovisual impulsado desde a Oficina de Cultura do campus de Lugo da USC ao abeiro do convenio Lugo Cultural no que tomaron parte máis de 70 persoas, agrupadas en sete equipos que concorreron ao certame con outras tantas curtas de novo cuño. Unha vez rematada a proxección das sete curtas completadas durante a última edición do maratón audiovisual Findecurta, o xurado deu a coñecer o seu fallo.
  • O conselleiro de Economía Francisco Conde, sinalou esta mañá que a nova web de Artesanía de Galicia se configura como o gran escaparate para impulsar a comercialización do sector, no que cobran protagonismo o produto, os artesáns e os oficios. Nun encontro con profesionais deste ámbito celebrado esta mañá en Noroeste Obradoiro, e que se puido tamén seguir de xeito telemático, Conde apuntou que a innovación e o deseño son as claves para que o sector siga sendo competitivo.
  • O conselleiro de Sanidade anunciou que o departamento sanitario galego, logo de avaliar cos técnicos de Saúde Pública e cos profesionais sanitarios a situación e progresión dos datos do foco da covid que está a producirse na Mariña, considera conveniente reforzar as medidas de prevención co obxecto de protexer, coa máxima intensidade posible, a saúde da poboación da Mariña e conter os contaxios para evitar a súa propagación máis aló desa zona.
  • Un paso adiante na optimización de fármacos para a inmunoterapia do cancro é o novo logro do grupo da USC no Centro Singular de Investigación en Química Biolóxica e Materiais Moleculares (CiQUS) que dirixe o profesor Eddy Sotelo. En colaboración coa Universidade de Upsala e a compañía farmacéutica Sosei Heptares, o artigo, recentemente publicado na revista Angewandte Chemie, describe novos avances no deseño e optimización de fármacos para a terapia do cancro.
  • A Xunta de Galicia vén de publicar o segundo número das Guías DXT Galego ‘Volvendo con sentidiño’ elaboradas pola Secretaría Xeral para o Deporte e expertos das tres universidades galegas que xa foi enviado a todos os clubs e federacións deportivas de Galicia e pode ser consultado na páxina web do Deporte Galego. Este segundo manual versa sobre as ‘Recomendacións para a aceleración da reactivación e readaptación técnico/táctica do deportista para a súa motivación e achegamento progresivo ás esixencias do partido’.
  • Un sistema de visión artificial capaz de detectar condutas irresponsables no control da COVID-19, un composto farmacolóxico para evitar os efectos negativos da radioterapia e da quimioterapia sobre a pel dos pacientes e unha laca de unllas medicamentosa son os gañadores dos Premios de Transferencia de Tecnoloxía, que chegan á súa sexta edición cunha dotación de 6.000 euros en cada categoría.
  • A máscara facial está a ser unha das ferramentas máis valiosas á hora de facer fronte á COVID-19 na actual etapa de ‘nova normalidade’. Con todo, o epidemiólogo Francisco Caamaño Isorna segue a reivindicar a necesidade de manter a distancia social. “A máscara debemos utilizala cando non poidamos manter a distancia de seguridade. É importante sinalar que levar a máscara non é unha alternativa a manter a distancia ou á hixiene de mans”, explica o profesor da USC .
  • As 54 oficinas de emprego de Galicia reabriron hoxe ao público tras o peche orixinado pola pandemia do covid-19. As oficinas abren en plenas condicións de seguridade e co seu horario habitual, de 9,00 a 14,00 horas, sendo necesario solicitar cita previa para garantir un adecuado control de aforo e acceso e organizar de forma axeitada os servizos á cidadanía. O ISSGA elaborou unha guía de recomendacións fronte á covid-19 específica para oficinas de emprego, o que serviu de base para o desenvolvemento dun plan de continxencia para a reapertura.
  • A conselleira de Educación e o director de FEUGA clausuraron a segunda edición do programa formativo en Xestión Estratéxica e Operativa dos Centros e Unidades de Investigación de Excelencia (GESCI-GOSCI), que contou coa intervención por videoconferencia como poñente invitado de Daniel Zajfman, director do Instituto Weizmann e recoñecido científico titular da cátedra de Astrofísica Simon Weinstock, e do director do programa e director da Rede CECA de Cataluña, Lluis Rovira.