Industria e distribución amosan a súa intención de sumarse ao Plan estratéxico de fortalecemento do sector lácteo

Representantes da Industria e da Distribución amosaron a súa intención de sumarse ao Plan estratéxico de fortalecemento do sector lácteo, tras a reunión que mantiveron coa conselleira do Medio Rural, Ángeles Vázquez, e a directora xeral de Gandaría, Agricultura e Industrias Agroalimentarias, Belén do Campo.

Ángeles Vázquez segue reuníndose con todas as partes da cadea co fin de sumar esforzos e buscar solucións efectivas á situación que padece este sector. Neste senso, durante o día de hoxe mantivo sendas xuntanzas co fin de animalos a seguir traballando unidos a prol deste eido produtivo.

A conselleira trasladoulles que este plan estratéxico -impulsado pola Xunta- pretende converterse nun foro de participación e consenso que sirva para facer unha análise do sector. As partes representadas nestas xuntanzas aseguraron que a súa intención é traballar conxuntamente, polo que están dispostos a participar neste Plan e, ademais, sinalaron que ven axeitado o Real Decreto sobre declaracións obrigatorias para os fabricantes de leite.

Maior transparencia

A titular de Medio Rural manifestoulles que este Real Decreto foi demandado polo Goberno galego a petición do propio sector e que servirá para dotar de maior transparencia á cadea de valor do leite, xa que fará público os datos sobre prezos de compra-venda do leite. Neste senso, Ángeles Vázquez insistiu en que o seu departamento estará vixiante para que todos e cada unha das partes cumpra co seu compromiso, xa que iso redundará en beneficio para todos os axentes da cadea, especialmente para os gandeiros.