Barreiro aposta por fomentar a educación ambiental a través dunha nova campaña divulgativa

O vicepresidente segundo e conselleiro de Medio Ambiente, Xosé Manuel Barreiro Fernández, presentou en Santiago unha nova campaña divulgativa dirixida aos máis novos e coa que se pretende fomentar a súa conciencia ambiental. No acto tamén participou o presidente de Sogama, Jaime Bermúdez, xa que esta sociedade é a promotora da iniciativa, para o que conta coa colaboración da Consellería de Medio Ambiente.

A Guía Pedagóxica para os alumnos é un manual totalmente didáctico -que inclúe un CD- e co que se pretende facilitarlle a poboación máis nova os coñecementos básicos sobre a redución de residuos, a reutilización e a reciclaxe, política coñecida como dos 3R. A nova campaña divulgativa prevé a edición de 4.500 unidades didácticas que se distribuirán nos 240 concellos adheridos a Sogama e nos seus centros de ensinanza primaria e secundaria, que suman arredor de 1.200 escolas.

Con este material divulgativo o departamento que dirixe Xosé Manuel Barreiro ten como obxectivo achegar aos rapaces e rapazas, como herdeiros do futuro medioambiental de Galicia, as claves para mellorar a xestión dos refugallos e, polo tanto, para avanzar na conservación do patrimonio natural da comunidade. Trátase dunha iniciativa orientada a favorecer a conciencia social, seguindo as recomendacións da Estratexia Galega de Educación Ambiental da Consellería de Medio Ambiente.

CONTIDO PARA CONCIENCIAR

O manual recolle unha breve introdución sobre os residuos na historia, desde o Paleolítico ata a época actual. Con este percorrido explícanse os avances en materia de xestión de refugallos, que na actualidade se realiza en Galicia a través do Complexo Medioambiental de Cerceda.

Na guía faise unha completa explicación dos diferentes tipos de residuos e dos colectores nos que deben depositarse, segundo a súa composición e o seu tratamento final. Trucos para reutilizar refugallos, ideas básicas para consumir tendo en conta o lixo que logo se xerará e exercicios prácticos sobre as explicacións ofrecidas son algúns dos contidos adicionais e de carácter máis innovador.

Cómpre sinalar que a Guía Pedagóxica para os alumnos inclúe unha parte na que se explica o funcionamento das ecoplantas e da planta de Sogama. A través da publicación os máis novos poden coñecer as distintas fases de transporte, separación e valorización de residuos, co que se produce enerxía para abastecer a preto de 100.000 fogares galegos.

COÑECER E RESPECTAR

No decurso do acto de presentación o titular de Medio Ambiente lembrou que esta iniciativa se enmarca no obxectivo de achegarlle á poboación a información precisa para que, a través do coñecemento, “se poida potenciar a implicación social no coidado e protección do contorno”. “A mellora do noso medio repercute de maneira directa no benestar na poboación e debe contribuír tamén ao desenvolvemento económico e social do país”, apuntou Xosé Manuel Barreiro.

Nesta liña, o máximo responsable da política ambiental da Xunta fixo referenza á aposta do Goberno galego pola maior difusión das actividades formativas e divulgativas en materia medioambiental, xa que a conservación do contorno natural só se entende a través das achegas da cidadanía. Así, Barreiro salientou que a responsabilidade da Administración, no marco do seu compromiso social co medio ambiente, é “facilitar os recursos que favorezan a participación activa do conxunto da poboación”.

POLÍTICA AMBIENTAL E SOLIDARIEDADE

O vicepresidente segundo referiuse a Sogama como a “mellor fórmula de xestión de residuos, xa que garante o tratamento integral e combina as políticas medioambientais co principio de solidariedade”. Segundo sinalou Barreiro, fronte a outras fórmulas, o Complexo Medioambiental de Cerceda demostrou capacidade para dar resposta ao conxunto da poboación sen discriminacións”. Neste sentido, o titular de Medio Ambiente insistiu na “man tendida da Administración cara outros sistemas de xestión de residuos, sempre con Sogama como eixe”.