A feira 'A ciencia que vén' celebrarase por primeira vez en Pontevedra

O evento desenvolverase entre 16.30 e as 19.30 horas e comprenderá tamén dúas presentacións de libros divulgativos e un coloquio sobre a alimentación do futuro, así como un xogo de rol sobre as consecuencias da crise climática, que terá lugar no Museo de Pontevedra.

Organizada pola Unidade de Cultura Científica e da Innovación (UCC+I) da UVigo, esta feira científica forma parte do programa anual de actividades 2023/2024 do plan Ciencia de Ida e Volta e conta co financiamento da Fundación Española para la Ciencia y la Tecnología (FECYT) – Ministerio de Ciencia, Innovación y Universidades e da Deputación de Pontevedra, así como coa colaboración do Concello de Pontevedra. Baixo o lema de Inflorescencia, neste evento outórgase especial importancia o papel da muller na ciencia e na investigación, ofrecendo unha vez máis a posibilidade de achegarse ao labor das investigadoras da Universidade, e despois de celebrar en Vigo as súas dúas primeiras edicións, trasladase neste 2024 a Pontevedra.

14 postos nos que achegarse á bioloxía, á enxeñaría ou á historia

Física, bioloxía, enxeñaría, telecomunicacións, historia e medio ambiente constitúen as liñas temáticas dun evento que arrancará na mañá do venres 31 coa visita do estudantado dos CEIP Bacelos e Froebel aos postos nos que 14 grupos de investigación darán a coñecer o seu labor, abríndose pola tarde ao público xeral. Entre outras propostas, esta expo-feira permitirá explorar as propiedades da contorna cunha cámara termográfica, da man do Grupo de Tecnoloxía Enerxética do Cintexc; ver mostras de tratamento de augas co grupo Biosuv e achegarse ás aplicacións clínicas de biomateriais e dispositivos biomédicos co grupo Novos Materiais FA3, tamén do Cintecx. O grupo XB2, do Centro de Investigación Mariña (CIM) proporá aos e ás visitantes construír unha dobre hélice de ADN con gominolas, mentres que o grupo de Filoxenómica do CINBIO levaraos a visualizar a estrutura do ADN a partir dun anaco de plátano. Así mesmo, o Grupo de Tecnoloxía Aeroespacial, de atlanTTic, promoverá unha exhibición de pequenos satélites realizando manobras de balanceo, mentres que o Mapas Lab convidará a explorar a evolución da vida na Terra pintando réplicas en escaiola de fósiles ou participando nun “xogo de supervivencia”.

Este conxunto de actividades divulgativas permitirán tamén coñecer proxectos de investigación internacionais como Agrosus que, da man do grupo BEV1, levará a explorar a diversidade agroecolóxica de Europa. Do mesmo xeito, o grupo BiotecnIA promoverá unha serie de actividades centradas nas súas liñas de estudo sobre o aproveitamento de residuos producidos nas industrias e a obtención de produtos de alto valor a partir de insectos comestibles. Ao mesmo tempo, esta expo-feira permitirá coñecer as investigacións que o grupo Geotech, do Cintecx, centra na monitorización de transporte con drons ou no desenvolvemento de ferramentas de dixitalización para a planificación de construcións.

Neste abano de propostas insírese tamén o obradoiro no que o Post-Growth Innovation Lab convidará a crear pezas artísticas con "materiais inspiradores para o coidado medioambiental" e a piscina de bolas na que o Grupo de Ecoloxía Animal animará os participantes a coñecer a biodiversidade do solo localizando bacterias, fungos e animais. Da man do grupo Griles, será posible achegarse ás características da lingua de signos española e o contexto social e cultural no que se desenvolve, mentres que no espazo do grupo HC1 poderán observarse as flutuacións demográficas da provincia de Pontevedra e unha prospectiva de como será en 2100.

Libros, conversas e un xogo de rol

Xunto a esta serie de obradoiros e xogos, a feira contará cun espazo no que terán lugar dúas conversas centradas en libros divulgativos promovidos ao abeiro do plan Ciencia de Ida e Volta. En primeiro termo, ás 17.30 horas terá lugar unha presentación de Quero ser unha investigadora 4, na que a vicerreitora de Comunicación e Relacións Institucionais, Mónica Valderrama, manterá unha conversa con algunhas das protagonistas da publicación. A continuación, integrantes dos grupos GETS-IT e Post-Growth Innovation Lab presentarán o Minidicionario de xustiza social. Tamén neste espazo, ás 19.00 horas terá lugar a charla A alimentación do futuro? O papel dos insectos na industria alimentaria, a cargo do investigador Nuno Muñoz, do grupo BiotecnIA.

En caso de chuvia, estas tres actividades trasladaranse ao Edificio Castelao do Museo de Pontevedra, onde a partir das 17.00 horas terá lugar o xogo de rol Alá ti!, centrado nas consecuencias da crise climática. Promovido polo Post-Growth Innovation Lab, trátase da única actividade que require de inscrición previa e está dirixida a maiores de 16 anos.