Membros da Comisión de Desenvolvemento Rexional do Parlamento Europeo visitan Galicia

Unha delegación da Comisión de Desenvolvemento Rexional do Parlamento Europeo, encabezada polo español Gerardo Galeote, visitará Galicia co fin de coñecer como se canalizaron os investimentos destinados á Comunidade Autónoma desde Bruxelas, mediante os fondos estruturais e os fondos de cohesión. A delegación visitará obras e proxectos financiados con fondos comunitarios como é o caso da planta de Sogama, en Cerceda. A continuación, os eurodeputados desprazaranse a Portugal para coñecer o estado de iniciativas sufragadas pola Unión Europea en diferentes rexións do país veciño. O presidente da Xunta manterá un encontro con esta delegación o mércores 13 de xullo.

Así, ademais de Galicia, esta delegación viaxará á Rexión Norte de Portugal e ao Algarve, onde coñecerá de primeira man o estado de obras executadas ao abeiro de diversos programas europeos de desenvolvemento rexional como é o caso do Interreg.

VISITA A DIFERENTES REXIÓNS

Esta visita enmárcase dentro dunha serie de desprazamentos promovidos pola Comisión de Desenvolvemento Rexional do Parlamento Europeo para que os seus membros coñezan o impacto dos fondos comunitarios en diferentes rexións de Europa.

A visita prodúcese nun momento no que a Unión Europea está a debater sobre a reforma da política de cohesión e desenvolvemento rexional. Así, desde o Parlamento Europeo preténdese coñecer as necesidades de diversas rexións comunitarias e o uso que realizaron dos fondos comunitarios.