Emilio Pérez Touriño pedirá ao presidente do Goberno unha contribución decisiva para a consolidación da Eurorrexión Atlántica

O presidente da Xunta de Galicia, Emilio Pérez Touriño, pedirá ao xefe do Executivo central, José Luis Rodríguez Zapatero, “unha contribución decisiva á consolidación da eurorrexión atlántica”, que abrangue “dende Asturias ata Porto” e na que “Galicia ten que xogar un papel fundamental”. O máximo mandatario galego adiantou esta mañá no Senado que na súa intervención de réplica do Debate sobre o Estado das Autonomías, que terá lugar esta tarde, manifestará ademais ao presidente do Goberno a súa intención de sumarse “con calor” ao proceso de reforma da Cámara Alta, así como o interese de Galicia na mellora do sistema de financiamento autonómico.

O presidente galego explicou que o impulso á eurorrexión atlántica “quere dicir pechar canto antes a Autovía do Cantábrico, o tren de alta velocidade do Eixo Atlántico, a conexión con Porto, onde lle pedirei ao presidente do Goberno un compromiso especial en relación co Goberno de Portugal”, e “a conexión da rede de cidades de Galicia coa alta velocidade coa meseta, con Madrid e coa rede europea de alta velocidade”.

Emilio Pérez Touriño dixo que a consolidación da eurorrexión atlántica “é un empeño e un obxectivo prioritario” do Goberno galego, posto que constitúe “a fachada marítima atlántica de España”, así como “un espazo de oportunidade portuario e de relación transatlántica”. Ao seu xuízo, Galicia, “xunto co presidente de Asturias e o Goberno portugués” debe “ir contribuíndo a crear nese territorio “un espazo de oportunidade” no que as distintas administracións agrupen posicións, un proceso no que a comunidade galega ten unha “imperiosa demanda dun compromiso pleno do Estado”.

Negociación multilateral do financiamento

O presidente da Xunta de Galicia considerou “moi positiva” a oferta manifestada polo titular do Goberno central respecto de mellorar o sistema de financiamento das Comunidades Autónomas, posto que “Galicia ten necesidade dunha maior suficiencia financeira”, para poder dedicar máis investimentos a educación, sanidade ou infraestruturas, “sobre todo na perspectiva da redución dos fondos europeos”.

Emilio Pérez Touriño deixou claro que “o financiamento é de todos, e todos o temos que definir”. Así pois, recalcou que hai que buscar “un acordo multilateral”. “Non pode ser acordado por unha comunidade en particular co Estado”, dixo. Destacou a necesidade de que o financiamento autonómico “sexa pactado e acordado no seo do Consello de Política Fiscal e Financeira, por todas as Comunidades Autónomas”. “Polo tanto, nada de financiamento acordado bilateralmente, e si unha revisión do sistema de financiamento que acordaremos nun proceso de concertación entre todas as CCAA co Goberno de España”, defendeu.

O máximo mandatario galego especificou que esta futura fórmula de financiamento debe garantir a Galicia “suficiencia financeira, máis autonomía financeira, máis corresponsabilidade fiscal, o que quere dicir incrementar a capacidade normativa sobre os nosos tributos, capacidade de ter unha axencia tributaria propia integrada na axencia estatal, pero tamén a capacidade de xestión de liquidación e recadación deses tributos no ámbito da comunidade”, e a garantía da solidariedade interterritorial. Asemade, apuntou que “para Galicia é moi importante” que na formulación do novo sistema de financiamento se teñan en conta “situacións diferenciais específicas”, como o avellentamento poboacional ou a dispersión poboacional.

Participación activa de Galicia na reforma

Cualificou de “proposta profundamente reformista e modernizadora” a manifestada polo presidente do Goberno para a mellora do Estado das Autonomías, porque mellora a presenza de Galicia ante os temas do seu interese. “Axenda reformista que nos permitirá situarnos en mellor posición a partir do éxito da experiencia de 25 anos de Estado das Autonomías”, opinou. Así pois, indicou que manifestará a José Luis Rodríguez Zapatero a súa “plena vontade” de que “Galicia participe activamente” no proceso de reformas necesarias para mellorar a participación das CCAA nas tomas de decisión do Estado.

“Miro o futuro con confianza e celebro o éxito do Estado das Autonomías mirando cara adiante, nunha posición de avance, de mellora e de reforma. Hai outros presidentes, basicamente dende posición do PP, que o miran con desconfianza e manteñen unha posición de inmobilismo. Preocúpame que non teñan asumido a necesidade da reforma do Senado ou que non lle vexan especial interese á mellora dos mecanismos de cooperación e participación das CCAA na formación da vontade do Estado”, explicou.

O presidente da Xunta manifestou a súa intención de sumarse “con calor” á defensa “dende a óptica de Galicia” da necesidade dun foro multilateral para definir os grandes plans de infraestruturas, medio ambiente, auga, inmigración ou xustiza no Senado como cámara interterritorial.