Ao longo do ano 2005 o paro descendeu en Galicia nun total de 6.004 persoas; é dicir, nun 3´25%

O número de parados rexistrados nas oficinas de emprego galegas diminuíu ao longo do ano 2005 en 6.004 persoas, e iso, a pesar do comportamento do pasado mes de decembro no que se produciu un incremento no número de desempregados de 5.838 persoas. Na evolución deste mes nos últimos anos observase que se trata dun período no que se producen ascensos significativos do paro rexistrado.

Este dato correspóndese co comportamento do conxunto do Estado no que se produciu un ascenso de 7.357 desempregados durante o mes de decembro, o que en termos porcentuais representa un ascenso do 0,35%, situando o número de parados en España en 2.102.937 persoas.

Aínda así consolídase na nosa comunidade o descenso da taxa interanual que rexistra unha notable baixada no número de desempregados, diminuíndo en 6.004 persoas. Galicia reduce o paro rexistrado interanual nunha porcentaxe de 3,25%, moi por riba da media do Estado que se sitúa nun 0,46%, é dicir, nos últimos doce meses en Galicia o paro rexistrado descendeu un 3,25% mentres que no conxunto do Estado esa diminución foi do 0,46%.

Con este descenso, Galicia sitúase entre as oito comunidades autónomas nas que se rexistra unha maior baixada do número de desempregados con respecto ao mes de decembro de 2004.

En total o número de desempregados de Galicia sitúase en 178.676, segundo se recolle no Informe de Paro Rexistrado correspondente ao mes de decembro de 2005, feito público hoxe polo Servizo Galego de Colocación, dependente da Consellería de Traballo.

Evolución Interanual

Na evolución interanual o número de parados diminúe en 6.004 persoas, o que representa en valores porcentuais unha reducción do 3,25%. En termos absolutos a cifra de parados rexistrada é a máis baixa dun mes de decembro dos últimos catro anos.

Evolución Mensual

Na evolución do mes de decembro dos últimos anos, obsérvase como estamos ante un mes onde se producen incrementos significativos do paro rexistrado. Neste ano 2005 amósase a mesma tendencia aínda que en termos totais o número de desempregados rexistrado no mes de decembro é o menor dos últimos catro anos.

Así, no mes de decembro o número de parados incrementouse en Galicia en valores absolutos en 5.838 persoas, o que en valores porcentuais representa un aumento do 3,38% con respecto ao mes de novembro. O comportamento da taxa de parados é común en todas as provincias galegas e en todos os sectores. Así o paro rexistrado aumenta nas catro provincias, sendo Pontevedra e A Coruña, con 2.569 e 2.547 parados máis que en novembro respectivamente, as que rexistran un maior incremento no número de desempregados.

No que se refire á distribución do desemprego por sectores, o da construcción e o da industria, acumulan o 64% do paro rexistrado neste mes de decembro, con 1.935 e 1.792 desempregados máis que o pasado mes de novembro respectivamente.

Por sexo o maior incremento prodúcese nos homes con 4.362 parados máis, practicamente o 75% do incremento total do paro neste mes de decembro. O paro feminino ascendeu no último mes do ano en 1.476 desempregadas.

Desagregado por idades o paro aumenta tanto nos menores de 25 anos cun incremento de 582 persoas, como nos maiores de 25 cun ascenso de 5.256 desempregados máis que en novembro de 2005.

Avaliando os parámetros de sexo e idade obsérvase como o paro increméntase en todos os segmentos agás nas mulleres menores de 25 anos, no que se produce un descenso de 128 desempregadas. O maior incremento prodúcese nos homes maiores de 25 anos cun aumento de 3.652 parados máis que en novembro.

Contratos

En Galicia rexistráronse en decembro un total de 57.247 contratos, o que supón un incremento en termos absolutos de 2.890 contratos con respecto a decembro de 2004, é dicir, un 5,32% máis.

Destes 57.247 novos contratos, 4.690, é dicir o 8,19%, corresponderon a contratos indefinidos, e o 91.81% foron temporais, é dicir, 52.557.

Ao longo do ano 2005 rexistráronse en Galicia un total de 791.228 contratos, dos que 69.860 foron indefinidos, é dicir o 8,83%, e 721.368 foron temporais, é dicir o 91,17%.