A Dirección Xeral para o Deporte presentará en breve o novo proxecto de deporte escolar

O director xeral para o Deporte, Santiago Domínguez Olveira, e o subdirector general de Cooperación Deporte e Deporte Paralímpico do CSD, Antonio Montalvo, informaron sobre as xornadas que se están a celebrar en Santiago sobre o deporte escolar.

Santiago Domínguez explicou que a Dirección Xeral está a piques de rematar o novo proxecto para o deporte escolar. “Por iso, pensamos que era o mellor momento para acoller estas xornadas de traballo, nas que se vai planificar o programa deportivo do ano 2007”, manifestou o director xeral, quen agradeceu ademais a colaboración do Consejo Superior de Deportes con Galicia.

Pola súa parte, Antonio Montalvo destacou a importancia destas xornadas nas que se avalía o traballo do ano pasado e se aportan novas propostas. “Partimos da idea básica de consolidar as competicións que temos actualmente e implantar novos deportes que están medrando, minoritarios e que necesitan o apoio das comunidades e do propio CSD”. Desta forma, no 2007 continuarán os 12 deportes actuais e incluiranse na programación 5 máis, como triatlón, fútbol sala e ciclismo. O representante do CSD finalizou agradecendo o traballo da Dirección Xeral para o Deporte e volveu a resaltar “o magnífico Campionato de España de Voleibol que se celebrou hai só uns meses no Recinto Ferial de Vigo”.