Emigración convoca bolsas para titulados de orixe galega que desexen cursar estudos universitarios de posgrao

A Secretaría Xeral de Emigración, baixo o obxectivo de estimular a formación dos talentos formados na Galicia exterior, acaba de convocar bolsas de estudo destinadas a titulados universitarios e profesionais titulados universitarios de orixe galega con residencia no estranxeira para a realización de estudos de posgrao nalgunha das universidades do Sistema Universitario de Galicia.

A través desta convocatoria a Secretaría Xeral de Emigración pretende fomentar a formación especializada das persoas con titulación universitaria de orixe galega tendo en conta a oferta que deste tipo de estudos ten o Sistema Universitario de Galicia.

O orzamento que Emigración habilita para este programa de bolsas ascende aos 100.000 euros, e a contía máxima de cada axuda non poderá superar os 7.500 euros. O procedemento de concesión destas bolsas, segundo resolución publicada con data de 15 de xuño no Diario Oficial de Galicia, realizarase en réxime de concorrencia competitiva, mediante a comparación e avaliación dos méritos achegados polos solicitantes, coa fin de establecer unha prelación entres estes de acordo cos criterios de valoración que se establecen e respectando os principios de obxectividade, igualdade e non discriminación.