A economía galega crece un 3'7% no primeiro trimestre e supera en dúas décimas o crecemento do conxunto de España

O crecemento da economía galega durante o primeiro trimestre de ano mantén o bo pulso con que rematou o exercicio 2005 e mesmo supera a taxa de crecemento do último trimestre. Segundo os datos de Contabilidade Trimestral feitos públicos hoxe polo Instituto Galego de Estatística (IGE), o crecemento do Produto Interior Bruto (PIB) galego no primeiro trimestre deste ano foi dun 3,7%, dous décimas por riba do rexistro do cuarto trimestre, e tamén dúas décimas máis que o crecemento rexistrado no conxunto español. Este incremento é o máis elevado dende o terceiro trimestre do ano 2004, ano e período especialmente significativo por celebrarse o Xacobeo.

Entre os rasgos máis salientables do período, os datos do IGE revelan o maior dinamismo da Formación Bruta de Capital, que creceu un 4,6% -fronte ao 4,4% do trimestre anterior-; e o crecemento acelerado das exportacións fronte ás importacións. En ámbolos dous casos, a evolución rexistrada supera ao do último trimestre do ano 2005, cun crecemento do 7% no caso das vendas ao exterior; e dun 6,6% no das compras. Na primeira magnitude, segundo indica o informe do IGE, é de salientar o positivo comportamento do turismo e das exportacións fóra de España.

Destaca tamén, dende a perspectiva da oferta, a aceleración rexistrada no sector industrial que avanza un 4,9% grazas, principalmente, á evolución das ramas de produtos enerxéticos (+3,8%) e de produtos industriais (+5,2%). Este crecemento, segundo recoñece o IGE, está en consonancia co forte crecemento experimentado polo Indice de Produción Industrial. O último dato dispoñible deste indicador, relativo ao mes de maio, amosa un crecemento en Galicia do 11,6% -a segunda comunidade tras Cantabria- fronte á media española do 7,9%.

Boa evolución do emprego

En canto ao emprego, os datos de Contabilidade Trimestral amosan un crecemento interanual do 3,1% durante o primeiro trimestre, que supera en case dous puntos a taxa do último trimestre de 2005, e en oito décimas a taxa media do conxunto dese ano. Medido en termos de ‘creación de postos de traballo a tempo completo’, o balance ata marzo reflicte un aumento de 32.552 nesta unidade. Cualitativamente, o dinamismo da creación de emprego foi maior nos servizos non de mercado e na construción, fronte a unha contracción nas ramas agraria e pesqueira, e enerxética.