Innovación e Industria concede axudas por importe de 1,6 millóns de euros coas que se acada a presenza do 90% dos concellos galegos na Sociedade da Información

A Consellaría de Innovación e Industria vén de conceder unha serie de axudas destinadas a fomentar a presenza dos concellos da comunidade autónoma na Sociedade da Información. Con estas medidas preténdese conseguir unha inversión total de aproximadamente 2,1 millóns de euros, dos cales Innovación e Industria subvenciona a cada concello até o 75% do seu gasto, o que supón un desembolso total de 1,6 millóns de euros aproximadamente. Con esta actuación lograrase que o 90% dos concellos galegos xa participen na Sociedade da Información.

Estas axudas, que foron publicadas no DOG do 30 de maio do presente ano, presentan dous tipos de actuacións segundo o volume demográfico de cada concello. Así, para os concellos que non superen os 6.000 habitantes preténdese que dispoñan dunha páxina web oficial, considerando que este é un medio indispensable para que os cidadáns poidan acceder a toda a información do seu municipio. No caso dos concellos cuxa demografía se sitúe entre os 6.000 e os 35.000 habitantes a Consellaría dotaraos de recursos financeiros para que poidan impulsar novas dinámicas sociais no ámbito da Sociedade da Información, a través da utilización de ferramentas que fomenten a interrelación entre os cidadáns e o achegamento da administración á xente do concello. Trátase con isto, entre outras, que as diversas asociacións poidan dispoñer dun espazo na Rede para promocionar e dar a coñecer as súas actividades.

Os indicadores do ano 2005 daban un moi baixo nivel de presenza en Internet dos concellos galegos. Esta cifra tornábase especialmente preocupante en concellos pequenos situados en zonas rurais, debido en parte aos escasos recursos económicos e sociais de moitos deles. Tan só un 31,25% dos concellos menores de 5.000 habitantes tiñan presenza na Rede. Estas medidas tomadas pola Consellaría de Innovación en Industria a través da Dirección Xeral de Promoción Industrial e Sociedade da Información, modificarán radicalmente o actual panorama permitindo que todos os concellos que solicitaron axuda teñan presenza na Rede.

De acordo coa liña vangardista e de constante evolución da Consellaría, as webs que se elaboren deben estar construídas sobre a base do software libre, dispor de documentos descargables en formato aberto, e ademais terán o galego como primeira lingua vehicular. Co fin de non limitar o acceso ás devanditas webs por parte de certos colectivos con discapacidades, estas cumprirán cos estándares de accesibilidade e usabilidade que son consideradas pola Unión Europea como normas de facto (W3C- WAI-AA).

O número total de concellos que recibirán as axudas é de máis de 180.