A Coruña será escala en 2007 da Regata La Solitaire Afflelou Le Figaro grazas ao apoio de Innovación e Industria

O apoio do Goberno Galego, a través da Consellaría de Innovación e Industria, fixo posible que a regata “La Solitaire Afflelou Le Figaro”, unha das probas máis importantes do calendario internacional de vela, faga escala en Galiza –máis concretamente en A Coruña– no verán do vindeiro ano.

Trátase dunha regata por etapas de navegantes en solitario e con embarcacións monotipo, que se desenvolve no Atlántico, entre Francia, a Península Ibérica e as Illas Británicas. Empezou a celebrarse en 1970 e actualmente está organizada polo prestixioso diario galo Le Figaro. A proba consta de catro etapas con saída e chegada final en Francia e con tres escalas, dúas delas fora do país galo (neste caso A Coruña vai ser unha delas). O gañador é o barco que faga o percorrido en menos tempo.

Presentación

O director xeral de Turismo, Rubén Lois González, estará presente na presentación oficial deste evento en París, acto presidido polos máximos responsables –presidente e director xeral– do Grupo Figaro. Lois González terá a oportunidade de intervir neste evento para promocionar o turismo náutico no noso país. Explicará que esta regata representa para Galiza unha magnífica oportunidade para reforzar a súa posición como destino náutico no ámbito internacional, continuando coa estela de acontecementos tan importantes como a Volvo Ocean Race, que saíu dende o noso país en novembro do pasado ano. Xunto co respaldo do Goberno Galego, a organización da escala en A Coruña desta proba náutica internacional contará coa colaboración do Concello e a Autoridade Portuaria da cidade herculina.

A regata “La Solitaire Afflelou Le Figaro” acadará en 2007 a súa edición número 38. O pasado ano, a escala na península foi en Santander. Dende 1970 participaron nesta proba preto de cincocentos skippers e a regata fixo escala en 46 cidades europeas. Na organización da proba traballan en torno a 80 persoas repartidas en 15 servizos (dirección de organización, dirección de regata, prensa, loxística, etc.), e tres barcos da organización escoltan á flota, polo que o paso por A Coruña representará tamén un acicate para a oferta aloxativa e turística da urbe, ademais de ter un importante impacto mediático, tanto na prensa especializada como na de información xeral, en especial en Francia polo eco de Le Figaro.