Guillermo Escrigas, novo director do CGAI

A Secretaría Xeral de Comunicación vén de nomear a Guillermo Escribas Rodríguez novo director do Centro Galego das Artes da Imaxe (CGAI). Guillermo Escrigas (Ferrol, 1953) traballaba como xerente do Centro Galego de Arte Contemporáneo Carlos Maside e como documentalista do Grupo Sargadelos.

No eido audiovisual descubriu e recuperou a película Botadura do Acorazado Alfonso XIII, as primeiras imaxes en movemento que se conservan sobre Galicia. Entre as súas publicacións cómpre destacar Rande. Mito e realidade, Bibliografía da Gastronomía de Galicia, Gravados e litografías de Maruja Mallo, O libro escolar en Galicia. Bibliografía, ou Isaac Díaz Pardo. Creación e compromiso na Galicia do século XX, entre outros moitos.

Ademais, foi o responsable da documentación gráfica en tres publicacións dirixidas por Ramón Villares: Galicia século XX, Estrella Galicia, unha empresa, un século e O mundo do traballo en Galicia.

Regularización da entidade

Jaime Pena, que ata o de agora viña realizando as funcións de director ata que se regularizara a situación da entidade, continuará coas súas tarefas como responsable da programación do CGAI nesta nova etapa. A Secretaría Xeral de Comunicación valora o seu labor durante estes meses de interinidade ao fronte da institución, recoñecemento que fai extensible a todo o equipo do CGAI.

A Secretaría Xeral de Comunicación explicara no seu día que o nomeamento efectivo do novo director se levaría a cabo unha vez solucionadas as xestións administrativas oportunas. Esta situación organizativa do CGAI viuse regularizada o 10 de xullo coa publicación no DOG do novo decreto de estrutura do Centro. Así dende a Xunta de Galicia considerouse que se daban as condicións necesarias para proceder ao nomeamento de Guillermo Escrigas ao fonte da dirección do CGAI.

Proxectos en marcha

A programación do outono do CGAI iniciouse o día 14 de setembro cun ciclo sobre o documentalista francés Raymond Depardon, organizado en colaboración coa Alianza Francesa. Coa mesma institución organizarase ademais un ciclo sobre Jacques Demy no mes de novembro.

No mes de outubro programarase o ciclo de Philippe Garrel, en colaboración co Festival de Cine de San Sebastián. Esta colaboración inclúe ademais a coedición dun libro sobre o autor coordinado por Quim Casas. Aínda no mes de outubro iniciarase un ciclo sobre o director americano Raoul Walsh que se prolongará ata marzo de 2008.

Con motivo do Festival de Cine de Xixón, o CGAI organizará un par de ciclos entre os meses de decembro e xaneiro. Un deles centrarase no novo cine alemán dos anos 60 e 70. Durante os meses de outubro, novembro e decembro programarase tamén o ciclo D-Generación, un proxecto do Festival das Palmas centrado nos novos documentalistas españois que traballan fóra da industria e en soporte dixital.

A programación do centro completarase cun curso de Carlos Losilla en outubro, así como con outras actividades nas que traballa o CGAI. O novo director será o encargado de dar a coñecer estas iniciativas unha vez estea pechada a programación.

Historia do Centro

O Centro Galego de Artes da Imaxe (CGAI) é un organismo dependente da Secretaría Xeral de Comunicación. Foi creado polo Decreto 210/1989, de 5 de outubro, da Xunta de Galicia e inaugurado oficialmente o 15 de marzo de 1991.

O centro dedícase á difusión e documentación da imaxe en todos os sentidos e é, polo tanto, a institución responsable no ámbito do audiovisual, dende a administración autonómica, de recuperar, catalogar, custodiar e difundir as producións e as obras conformadoras do patrimonio audiovisual e fotográfico galego.

Dentro das múltiples actividades que vén realizando de arquivo, restauración e fomento da promoción e difusión do audiovisual galego, quérese darlle un pulo máis utilizando para isto as novas ferramentas que proporcionan as tecnoloxías da información e as comunicacións, levando todas as súas actividades pola xeografía galega co obxectivo dun mellor coñecemento das artes da imaxe.

Fotografía de Xoán Piñón remitida polo Gabinete de Comunicación da Xunta de Galicia