Novo portal web da TDT en Galicia

A Dirección Xeral de Comunicación Audiovisual puxo en marcha esta semana o portal temático da TDT en Galicia, http://www.tdtgalicia.es. Este portal achega información a través da rede tanto de carácter xeral como específica sobre a televisión dixital terrestre e diríxese tanto aos cidadáns como a profesionais relacionados con esta nova tecnoloxía. A través desta ferramenta de consulta, os usuarios poderán coñecer, entre outros, as vantaxes que presenta esta nova tecnoloxía, os pasos necesarios para acceder á mesma ou o progreso do proceso de despregamento da nova televisión na nosa comunidade.

O lanzamento deste portal enmarcase dentro dunha serie de iniciativas dinamizadas levadas a cabo dende a Xunta de Galicia, encamiñadas a asegurar o correcto despregamento da televisión dixital terrestre na nosa comunidade. Así, logo da creación e posta en marcha da oficina técnica de TDT e do primeiro plan piloto de apagamento analóxico a nivel nacional realizado hai uns meses na Fonsagrada, este portal eríxese coma a peza fundamental de consulta posta disposición de todos os usuarios. A iniciativa pretende e trata de dar resposta a todas as necesidades de información que puidesen ter tanto os consumidores coma os axentes involucrados no contorno da TDT (fabricantes, operadores de rede, radiodifusores, etc.)

O portal estrutúrase en catro grandes áreas temáticas:

• Información xeral da TDT, que conterá información de detalle acerca da TDT e das súas vantaxes.
• Consumidores, que explicará cales son os tres pasos básicos que deben tomarse para acceder á nova televisión.
• Axentes, que achegará aos diferentes profesionais relacionados coa TDT de datos de contacto, información acerca da lexislación vixente e demais información de carácter técnico.
• Oficina Técnica de TDT, na cal se ofrecerá unha primeira visión sobre a estrutura da mesma, sobre os obxectivos que nesta se perseguen, e os servizos que presta.

Os contidos presentados en cada un dos apartados do portal WEB evolucionarán progresivamente na medida en que avance o proceso de despregamento da televisión dixital terrestre na nosa comunidade.

Ademais das áreas temáticas comentadas con anterioridade, o cidadán poderá acceder a múltiples apartados coma novas, eventos e destacados relacionados co progreso de dixitalización dos fogares. Estes apartados actualizaranse con frecuencia co obxectivo de manter ao usuario informado de todas as novidades relacionadas coa TDT. Así mesmo, o usuario poderá coñecer de primeira man a data do apagamento analóxico e os días que restan ata a dixitalización do seu concello, así como consultar e dar resposta ás preguntas máis frecuentes no que á TDT se refire.