O 012 centraliza a información da Xunta

O conselleiro de Presidencia, Administracións Públicas e Xustiza, José Luis Méndez Romeu, anunciou que o novo servizo 012, de atención e información telefónica ao cidadán, está “totalmente operativo” e busca ofrecer aos cidadáns toda a información posible sobre os servizos administrativos das diferentes consellerías da Xunta de Galicia. Ademais, Méndez Romeu dixo que o 012 pretende substituír progresivamente os 54 teléfonos de información especializada que ten o Goberno galego. O titular de Presidencia fixo hoxe estas declaracións durante unha rolda de prensa para presentar o teléfono 012, as cartas de servizo e Observatorio da Calidade e da e-administración en Galicia (OCEG).

Así, o conselleiro explicou que os actuais 54 teléfonos de información da Xunta -de distintas tipoloxías de chamada: números 100, 901, 902 e outros de código normal e con tarifas distintas- quedarán para información interna, para acudir a eles en caso de necesitar información altamente especializada. Deste xeito, Méndez Romeu declarou que “unha chamada ao 012 permitiralle ao usuario ter a resposta que necesite”. Ademais, o 012 funciona en horario continuado e sen necesidade de ter que desprazarse a unha oficina pública, sen ter que consumir máis tempo que o dunha chamada telefónica, segundo o conselleiro. Méndez Romeu explicitou que isto farase nun tempo áxil e de maneira eficaz. De feito, dixo que o obxectivo é que o 012 teña unha información máis ampla, máis organizada e máis traducible á necesidade do cidadán.

Este teléfono é, segundo o conselleiro, un servizo co que se da “un paso máis nas prestacións dunha Administración moderna” e forma parte da política de situar ao cidadán “no centro da Administración”. Co 012, Galicia sitúase entre as Comunidades máis avanzadas xa que dous terzos das mesmas xa tiñan este servizo, dixo Méndez Romeu. Así mesmo, o conselleiro valorou que é un número fácil de lembrar e un sistema escalable xa que se se incrementa o número de chamadas, pódese aumentar o número de operadores e a tecnoloxía para poder dar unha resposta axeitada. Ademais, establécese un sistema de alertas para que os cidadáns que necesitan un determinado tipo de información poidan ser preavisados.

O mes pasado houbo, segundo o conselleiro, 8.500 peticións de información, das cales 5.185 foron resoltas directamente polos operadores do 012, 3.230 derivadas a outras oficinas telefónicas e 85 contestadas posteriormente. Ademais, nos últimos dous días incrementáronse as chamadas nun 20%.

Portal da cidadanía

Dentro desta liña de implantación da administración electrónica, o conselleiro tamén avanzou que para o vindeiro mes de decembro se modificará de novo o portal institucional da cidadanía -que segundo o conselleiro xa se cambiara “radicalmente” a fins do 2005- para implantar un sistema “inda máis accesible” e implicará un investimento de 400.000 euros na primeira fase.

Permitirá, ademais, integrar as informacións de todas as páxinas web da Xunta –unhas 400 páxinas- e integralas dun xeito visual e rápido para que o cidadán teña que facer menor número de movementos ou clics para chegar ao que está buscando, segundo Méndez Romeu. Este portal basearase nunha estrutura xerarquizada e organizada en base a “feitos vitais”, en base ao que lle interesa aos cidadáns para a súa vida, e non por estruturas administrativas xa que para os cidadáns “non é tan doado de buscar”, afirmou Méndez Romeu.

Cartas de servizo

As cartas de servizos son, segundo o conselleiro, “a garantía do que os cidadáns lle poden esixir á Administración”. Méndez Romeu sinalou que xa se publicou un decreto –aprobado en Consello o 22 do mes pasado- que regula as cartas de servizo. A primeira carta de servizo publicada é, segundo dixo, a de servizos de xestión e soporte das infraestruturas corporativas informáticas e de telecomunicacións e todas terán o mesmo esquema: definición de compromisos e garantías de calidade, procedementos para resolver as reclamacións, estándares para a resolución desas reclamacións e os obxectivos a conseguir. Agora, cada unidade administrativa terá que definir os compromisos de cara ao cidadán que está disposto a asinar con este esquema de control, segundo o titular de Presidencia.

As cartas de servizos son un importante instrumento de xestión da calidade que promove un proceso de análise e mellora dos servizos dunha organización e cuxos resultados se plasman en documentos divulgativos de acceso público, impresos ou electrónicos, nos que, como mínimo, se identifican servizos públicos que presta a organización, os órganos responsables desa prestación, os dereitos dos usuarios deses servizos, así como niveis estándares e compromisos de calidade aos que se axustará a prestación dos ditos servizos.

Poderán elaborar proxectos de cartas de servizos os órganos, centros ou unidades, calquera que sexa o seu nivel orgánico, con competencia material ou funcional nos servizos sobre os que se pretenden desenvolver as respectivas Cartas. Estas poden ter por obxecto o conxunto dos servizos ou servizos específicos que un órgano ou nivel organizativo da Administración da Xunta de Galicia prestan ben ao cidadán, ben ao propio persoal da Administración autonómica ou outros órganos, centros, departamentos ou entidades dependentes da Xunta de Galicia.

Así mesmo, para os supostos nos que o ámbito competencial sobre uns servizos corresponda a varias organizacións responsables da prestación deses servizos, se distinguirá entre cartas de servizos Interdepartamentais e Cartas de Servizos Interadministrativas. As primeiras son aquelas Cartas que teñan por obxecto un ou varios servizos nos que na súa prestación participan distintos órganos ou organismos dependentes de máis dunha consellería da Xunta de Galicia; as interadministrativas son nas que na súa prestación participan, ademais de órganos ou organismos dependentes da Xunta de Galicia, outros órganos ou organismos doutras Administracións públicas.

Observatorio

O Observatorio da Calidade pretende facer un seguimento sistemático do estado da implantación electrónica en Galicia, explicou Méndez Romeu. O primeiro documento producido é –segundo o conselleiro- o informe sobre o estado da Administración electrónica na Xunta. Nel defínense as barreiras que inda existen para o desenvolvemento da e-administración e as aplicacións, sistemas de seguridade e liñas de traballo que se están aplicando, dixo.

O Observatorio da Calidade e da Administración Electrónica de Galicia terá como fins últimos os de promover e executar actuacións de recompilación, análise, seguimento e valoración da tendencia da xestión da calidade; a modernización e a administración electrónica nas Administracións públicas galegas; así como promover a difusión de datos, informacións e coñecementos sobre ditas materias.

Entre as funcións principais do OCEG está desenvolver ou promover recompilacións, estudios e análises de datos que permitan coñecer cunha visión global o nivel de desenvolvemento, a tendencia e as posibles problemáticas que poden afectar á extensión da modernización, a xestión da calidade e a Administración electrónica nas Administracións públicas galegas. Así mesmo, tamén pretenderá facilitar análises comparativas e alineamentos dos datos dese nivel de desenvolvemento e tendencia cos doutras Administracións públicas nacionais ou internacionais ou promover nas súas materias o intercambio de experiencias e información cuantitativa e cualitativa, así como a cooperación entre Administracións, observatorios da calidade e outros organismos ou entidades -públicas ou privadas-, profesionais e investigadores de ámbito autonómico, nacional ou internacional.