O presidente da Xunta recibe a estilográfica coa que Cela escribiu a última novela

O máximo mandatario autonómico, Emilio Pérez Touriño, recibiu de mans da presidenta da Fundación Camilo José Cela, a pluma estilográfica coa que o escritor padronés escribiu a súa última novela, Madera de Boj, ambientada na Galicia mariñeira. O presidente da Xunta reuniuse con Marina Castaño, quen lle fixo entrega da estilográfica personalizada coas iniciais de Camilo José Cela.

Segundo explicou Marina Castaño, a Fundación Camilo José Cela considerou oportuno que a estilográfica estea en mans do presidente de todos os galegos, e non exposta nunha vitrina. Esta decisión, segundo remarcou a presidenta da Fundación, está en plena sintonía co disposto polo propio premio nobel, quen decidiu facer a doazón do seu legado cultural a Galicia, deixando disposto que os bens que o integraban podían ser cedidos a título gratuíto cando isto facilitase o cumprimento dos fins fundacionais.

O presidente da Xunta manifestou o seu agradecemento á Fundación Camilo José Cela e a súa satisfacción por poder asinar documentos oficiais coa estilográfica do Nobel galego.

Marina Castaño, pola súa parte, amosou a súa ledicia porque a Presidencia da Xunta aceptase a doazón da estilográfica, un feito que, segundo indicou, axudará significativamente ao coñecemento da Fundación Camilo José Cela e á divulgación da figura do escritor padronés.

A pluma entregada hoxe ó presidente da Xunta é unha Montblanc Meisterstück personalizada coas iniciais de Camilo José Cela.