Impulsada a creación dun centro mixto de investigación de excelencia en física

A conselleira de Educación e Ordenación Universitaria, Laura Sánchez Piñón; o secretario de Estado de Investigación e presidente do Centro de Investigacións Enerxéticas, Medioambientais e Tecnolóxicas (Ciemat), Carlos Martínez Alonso; e o reitor da Universidade de Santiago de Compostela (USC), Senén Barro creación, a partir do Instituto Universitario Galego de Física de Altas Enerxías (IGFAE), dun centro mixto de investigación, con titularidade compartida. Os obxectivos deste centro son impulsar a investigación de excelencia no campo da Física de Altas Enerxías, en particular nas súas aplicacións en Física Médica e especialmente no desenvolvemento de instrumentación e técnicas de utilidade clínica así como na súa aplicación ás tecnoloxías de comunicación GRID; e promover o desenvolvemento científico, tecnolóxico, a transferencia de tecnoloxía e a innovación nos campos de actuación do Centro, difundindo a investigación realizada nel e establecendo canles estables de colaboración cos sectores empresariais e tecnolóxicos relacionados.

Neste senso, as administracións públicas asinantes manifestan o seu interese en colaborar no progreso da investigación e o desenvolvemento tecnolóxico no campo das altas enerxías, desenvolvendo proxectos científico-técnicos conxuntos e facilitando a promoción de centros mixtos de titularidade compartida que dispoñan dos recursos necesarios para converterse en centros de referencia nacional e internacional.

O novo centro mixto terá a súa sede en Santiago de Compostela, asumindo a Xunta de Galicia e a USC o compromiso de proporcionar os locais necesarios para a súa ubicación. Neste convenio establécese a colaboración na realización dos trámites previos á creación deste centro mixto de investigación mediante a transformación do IGFAE, un instituto cuxo obxectivo central é a realización de proxectos de investigación básica e aplicada, o desenvolvemento tecnolóxico e o fomento da actividade industrial en tecnoloxías relacionadas coa física de altas enerxías.

Os seus grupos gozan dunha sólida reputación internacional avalada polo elevado e mantido índice de impacto das súas contribucións científicas e o desenvolvemento de diversos proxectos de investigación en colaboración co Laboratorio Europeo de Física de Partículas (CERN), así como con outros grandes laboratorios internacionais. Neste senso, dentro do CERN o IGFAE participa no experimento LHCb que se está levando a cabo no novo acelerador LHC (Large Hadron Collider), que comezou a funcionar o pasado 10 de setembro.

O IGFAE participa tamén no proxecto de creación do futuro Centro Nacional de Física de Partículas, Astropartículas e Nuclear, financiado polo programa Consolider-Ingenio 2010 do anterior Ministerio de Educación e Ciencia. Ademais, o Grupo de Astropartículas do IGFAE participa no Laboratorio Internacional Pierre Auger situado en Malargüe, na provincia arxentina de Mendoza, cuxo obxectivo é o estudo dos raios cósmicos de moi alta enerxía e a clarificación da súa composición e orixe. Os ingresos por actividades de I+D do IGFAE do 2005 ao 2007 superaron os 5.550.000 euros.

Internacionalización da ciencia galega

Trala sinatura deste convenio, a conselleira de Educación salientou que o labor científico-tecnolóxico desenvolvido polo Instituto Universitario Galego de Física de Altas Enerxías (IGFAE) conta a partir de agora coa colaboración do CIEMAT, o que supón un impulso á excelencia e internacionalización da ciencia que se fai en Galicia. Ao mesmo tempo, Laura Sánchez Piñón indicou que o paso dado hoxe de cara á creación dun centro mixto de investigación de excelencia en física de altas enerxías constitúe “unha proxección para os grupos de investigación que están traballando no IGFAE” e que están a colaborar en proxectos como o Observatorio Pierre Auger e o CERN.

Pola súa banda, o secretario de Estado de Investigación destacou que “a grande revolución da bioloxía molecular, isto é, a enxeñaría xenética ou os grandes avances nos sistemas de detección precoz de enfermidades teñen a súa orixe na física de altas enerxías” e significan a concreción dun “modelo de colaboración da comunidade científica”. “En Europa somos líderes en física de altas enerxías”, subliñou Carlos Martínez. Neste senso, manifestou o seu desexo de que “España se converta na California de Europa”. Ademais, o secretario de Estado de Investigación destacou “o labor científico desenvolvido polo CERN, que proporciona unha extraordinaria achega ao coñecemento científico ao tempo que mellora a sociedade do coñecemento”.

O reitor da Universidade de Santiago de Compostela cualificou o acordo asinado hoxe como “positivo”, subliñando que supón “un paso máis na ciencia que se está desenvolvendo desde o IGFAE”. “O impacto internacional do labor científico require de macroestruturas como a que hoxe se inicia”, destacou Senén Barro, ao tempo que indicou que “moitos dos avances en Medicina están baseados sobre todo no labor dos físicos”.