O PPdeG celebrará en setembro unha gran festa para a militancia en Silleda

O Partido Popular de Galicia celebrará en setembro unha gran festa da militancia en Silleda, á que acudirán máis de 15.000 persoas. O encontro, que será o máis numeroso dos celebrados polo PPdeG desde o Congreso no que Alberto Núñez Feijóo se alzou coa Presidencia do partido en xaneiro de 2006, será unha mostra de forza dunha formación que pretende estar tan activa apoiando ao Goberno como o estivo na oposición.

Os populares protagonizarán un encontro multitudinario que servirá para celebrar de forma conxunta os éxitos colleitados nas eleccións autonómicas e europeas celebradas neste 2009. As primeiras devolveron ao PPdeG a Presidencia da Xunta, e as segundas permitiron ao partido alcanzar unha histórica porcentaxe de voto, superior ao 50%, que significou que máis da metade dos electores galegos apoiasen ao Partido Popular de Galicia.

A cita permitirá ao PPdeG entrar con forza no novo ciclo político que se estrea en setembro, e no que o partido afronta o reto de permanecer tan activo sendo a forza que sustenta a acción de Goberno en Galicia como o estivo cando exerceu de oposición na Comunidade. O reto é o mesmo: ser a voz da rúa. Con todo, a ese obxectivo únese agora o de ser os ollos e os oídos da Xunta a pé de beirarrúa, de canalizar as sensacións da rúa e manter ao Goberno unido aos cidadáns.

Ese labor, clave, vénse realizando de forma continua desde o día 1 de marzo en que gañamos as eleccións e desde o 20 de abril en que empezamos a gobernar. Con todo, actos como o que terá lugar en setembro en Silleda reforzarán aínda máis as ganas dos militantes e simpatizantes populares de seguir traballando duro por Galicia dende as filas do partido maioritario.

O PPdeG sacará músculo celebrando un acto dunhas dimensións ás que non podería aspirar ningunha outra forza en Galicia. Os populares cren que actos como estes permiten ao partido seguir mobilizado para empezar a gañar desde xa as eleccións municipais de 2011. O PPdeG, activado, é unha poderosa maquina de colleitar vitorias e o acto de Silleda amosará que o partido está activo e que os nosos rivais políticos terán moi difícil superarnos, aínda coas súas habituais alianzas.

A cita será moito máis que un mitin político; será unha celebración na que os discursos compartirán espazo con actuacións musicais e espectáculos de diversa índole: un acto moderno para un partido moderno formado por unha nova xeración de políticos que é na que os cidadáns depositaron a súa confianza para rexer os destinos de Galicia.