Preséntase a Asociación de Municipios do Camiño de Santiago

O xerente do Xacobeo, Rafael Sánchez, asistiu en representación de Turismo de Galicia ao acto de presentación da Asociación de Municipios do Camiño de Santiago que tivo lugar no Teatro Principal de Burgos.

Esta asociación nace co obxectivo de coordinar accións entre os municipios para mellorar tres aspectos concretos: a atención ao peregrino, o coidado do Camiño e o apoio aos municipios que forman parte da Ruta Xacobea.

Así, as actuacións deste colectivo xacobeo oriéntanse a unificar e coordinar criterios de actuación e a traballar de forma colaborativa para protexer e dinamizar o Camiño; desenvolver proxectos e optimizar os recursos.

O proxecto naceu en novembro de 2013, promovido pola Asociación de Amigos do Camiño de Santiago de Jaca, coa firma nesa cidade dun protocolo de adhesión dos concellos de Santiago de Compostela, Logroño, Burgos, Astorga e Jaca.

Desde entón, foron uníndose un gran número de municipios do Camiño ata aglutinar, na actualidade, un total de 24: Canfranc, Jaca, Santa Cilia, Sangüesa, Ponte a Raíña-Gares, Estella-Lizarra, Logroño, Navarrete, Nájera, Santo Domingo da Calzada, Burgos, Castrojeriz, Frómista, Carrión de los Condes, Sahagún, León, Hospital de Órbigo, Astorga, Ponferrada, Paradela, Palas de Rei, Melide, Portomarín e Santiago de Compostela. Así mesmo, outras cidades xa mostraron o seu interese por incorporarse a esta iniciativa.

O evento de presentación congregou a representantes dos municipios asociados, así como a personalidades de diversas administracións tanto do Estado como autonómicas que apoian o proxecto.