A aceleradora Cologistics permitirá que 20 proxectos de emprendemento contribúan a mellorar as capacidades loxísticas da eurorrexión

O vicepresidente económico e conselleiro de Economía, Empresa e Innovación, Francisco Conde, participou esta mañá, en Vigo, na presentación de CoLogistics Business Accelerator (CBA), a primeira aceleradora galega no eido da loxística e da cadea de subministración. Segundo explicou, permitirá que 20 proxectos de emprendemento contribúan a mellorar as capacidades loxísticas da Eurorrexión a partir da tecnoloxía.

Na súa intervención, Conde destacou o papel esencial que a loxística debe xogar na reactivación económica, na captación de fondos europeos para Galicia e en facer fronte ao reto da transformación dixital. Lembrou que este sector foi o que permitiu garantir a subministración durante os meses máis duros da pandemia, posibilitando que moitas empresas puideran continuar coa súa actividade. Trátase dun sector que representa o 4% do PIB galego, no que operan máis de 11.700 empresas e que dá emprego a 49.000 persoas na Comunidade.

A nova aceleradora é un paso máis neste proxecto de cooperación transfronteiriza que une á Xunta, coa Confederación de Empresarios de Pontevedra (CEP), a Autoridade Portuaria de Vigo, así como a Associaçao dos Portos de Douro, Leixões e Viana do Castelo, a Associaçao Empresarial de Portugal e a Cãmara Municipal de Vilanova de Famalição. O obxectivo é apoiar novos proxectos de emprendemento a partir da tecnoloxía, xa que se necesitan proxectos e solucións innovadoras que contribúan a mellorar a eficiencia deste sector.

Constará de tres fases: lanzamento, selección e desenvolvemento efectivo, cun itinerario de aceleración ou consolidación das iniciativas. Estas contarán coa guía dun mentor dunha empresa consolidada (participan 14 galegas e 9 portuguesas) e con acceso a formación, zona de traballo, financiamento e espazos de networking.O prazo para a presentación de candidaturas estará aberto ata o 30 de xullo.

O vicepresidente económico explicou que esta aceleradora está aliñada cos retos da Estratexia integral de optimización loxística de Galicia que conta cun orzamento de máis de 11 millóns de euros no período 2019-2022. Tamén lembrou a oportunidade que, para este sector, supoñen os fondos Next Generation e puxo como exemplo o proxecto Smart Logistic Areas Galicia, para o desenvolvemento de áreas de aparcamento sostibles dentro das zonas loxísticas das cidades galegas e que terá como piloto inicial a área de Vigo.