Galicia e Andalucía apostan por xerar sinerxías para seguir avanzando na sustentabilidade das praias, portos e centros azuis

A visita, organizada pola Asociación de educación ambiental e do consumidor (Adeac, que outorga os galardóns azuis), inclúe visitas a distintas instalacións da provincia de Huelva que contan con estes recoñecementos como a praia Islantilla (entre os municipios de Illa Cristina e Lepe), o Sendeiro Azul da Antilla (Lepe), a praia do Espigón (Huelva) ou o porto do Terrón (Huelva).

Deste xeito, coñeceron distintas zonas da provincia e tanto as accións como aplicacións que desenvolven na súa aposta pola promoción turística e pola protección do patrimonio natural. No caso do areal de Islantilla, trátase dun dos pioneiros en recibir a bandeira azul e caracterízase por unha grande área de protección dunar cun importante labor informativo para o seu coidado e cunha boa xestión nos últimos anos.

As representantes da delegación galega puxeron en valor os esforzos dos concellos e da Administración autonómica a prol da prestación dos mellores servizos posibles neses espazos naturais ao tempo que trasladaron o compromiso de seguir incidindo nos valores que representan os recoñecementos outorgados por Adeac.

Galicia ten este ano un total de 114 praias con bandeira azul polo seu cumprimento en materia de sustentabilidade, accesibilidade e servizos aos usuarios. De feito, a comunidade galega concentra case unha de cada cinco bandeiras concedidas en España (638) e consolida a súa posición entre as tres comunidades que reciben un maior número de distintivos para as súas praias, xunto con Valencia (que suma 138) e Andalucía (130).

Adeac tamén entregou bandeira azul a 11 portos deportivos (dun total de 102 en España) e, aínda que non lucirán bandeira como tal, recoñeceu o labor dos chamados centros azuis, categoría na que se engloban aulas de natureza, centros de recepción de visitantes e instalacións similares dedicadas á educación ambiental. Dos 87 galardoados en todo o país, 15 están en Galicia.

Por último e con relación aos chamados sendeiros azuis, Galicia segue sendo a comunidade con máis distintivos (49), 14 máis que na edición anterior. En total, e sumando praias, portos, centros de visitantes e sendeiros distinguidos este ano por Adeac, Galicia atesoura 189 insignias azuis, una más que Andalucía (con 188) situándose como a segunda comunidade española con máis distintivos azuis en todas as categorías.