Declaración Institucional do Presidente da Xunta
... para enviar desde aquí o noso máis sincero recoñecemento a estes dous mozos que perderon a vida na ardua loita contra o lume; e para expresar as nosas condolencias ás súas familias, ós seus amigos, a todos os seus seres queridos, ós que comprometemos todo o apoio persoal que necesiten nestes momentos tan difíciles.Tamén me gustaría transmitir un recoñecemento especial ós máis de 6.000 integrantes dos dispositivos de extinción que protexen de forma ininterrompida os nosos montes e que se enfrontan a diario contra o lume e contra os seus perigos.
Nesta xornada dificilísima para todos os brigadistas, queremos que sintan máis que nunca a nosa proximidade, a nosa gratitude e o noso cariño. Queremos que se sintan acompañados por toda a sociedade galega na tarefa fundamental que desempeñan, como é a loita contra o lume.
Teño a convicción de que a nosa é unha terra con vontade de erradicar os lumes definitivamente da súa historia; e que condena enerxicamente os incendios que se orixinan con nocturnidade e aleivosía, como o que esta pasada madrugada se cobrou a vida de dous mozos en Fornelos de Montes.
Con esa certeza, a Xunta seguirá traballando en todas as frontes, coordinadas a través do comité de seguimento operativo dende o inicio desta campaña de incendios. Seguiremos traballando para coñecer a fondo as circunstancias desta traxedia humana; e para que a investigación aberta dea resultados canto antes. Seguiremos traballando para perseguir ós incendiarios. É prioritario poñer fin á actividade criminal nos montes e, por iso, redobraremos esforzos para que a loita contra a actividade pirómana siga sendo implacable: os delitos forestais teñen que ser detectados, perseguidos e condenados. Seguiremos traballando na loita contra o lume, tanto para previr a aparición de novos focos, como para extinguir completamente os incendios activos.
E, por suposto, seguiremos traballando coa única conduta posible, dende a responsabilidade de goberno. A través da colaboración cidadá e da cooperación con todas as administracións, coas forzas e corpos de seguridade, e con todos os grupos políticos.
Neste senso, quero informarlles que:
Mantivemos e mantemos comunicación permanente co Goberno central. Os conselleiros de Presidencia e Medio Rural, e eu mesmo falamos persoalmente ao longo da mañá co delegado do Goberno en Galicia, con dous membros do Executivo Estatal, a ministra de Medio Ambiente e o ministro de Fomento, e co Presidente do Goberno, que me acaba de transmitir a súa solidariedade e a súa implicación na loita contra os incendiarios, do mesmo xeito que o acaba de facer o líder da oposición, o señor Rajoy.
Tamén mantiven conversas dende primeira hora da mañá co Secretario Xeral do PSdeG e co voceiro nacional do BNG; para transmitir toda a información da que dispoñemos e agradecer a súa colaboración. E, do mesmo xeito, estamos en constante coordinación cos concellos afectados para xestionar da forma máis breve posible tanto a extinción definitiva do lume, como para - sobre todo- dar todo o apoio necesario ás familias dos dous falecidos. Quero subliñar e recoñecer a responsabilidade de todos, que unanimemente transmitiron a súa condena e a súa implicación na loita contra á actividade incendiaria, un reto no que todos somos necesarios e co que todos debemos comprometernos.
O Goberno galego seguirá poñendo todos os meios posibles para evitar desgracias coma a que hoxe lamentamos ou coma os dramas vividos no pasado, pero é imprescindible a colaboración de toda a sociedade. E a Xunta de Galicia seguirá contando con todos para lograr que triunfen os que loitan contra os lumes e fracasen os incendiarios.
Moitas gracias