Skip to main content

Notas

  • O salón de actos da Escola Técnica Superior de Arquitectura da Universidade da Coruña acollerá este mércores a conferencia de Julián Salas, 'Construíndo con recursos escasos. Contra a fame de vivenda en África'. Julián Salas implementou tecnoloxías apropiadas e apropiables e desenvolvementos metodolóxicos para construír en lugares do sur global onde podería parecer imposible construír.
  • Dentro da programación do bicentenario de Paradela, o domingo, 6 de novembro, vaise celebrar o encontro coa natureza CAMIÑANDO POR PARADELA, que o Concello organiza coa colaboración do grupo ACIVRO. Percorrerase o Camiño Vello de Aldosende, desde o Mirador de Cabodevila, preto do Río Loio, ata a parroquia de Aldosende. É un Camiño xa coñecido polos vinculados ao sendeirismo e turismo de montaña, que especialemente nas fins de semana recibe a numerosos camiñantes de todo Galicia.
  • O Xardín das Pedras que Falan, en Santiago de Compostela, alberga dende este venres dúas inscricións dedicadas ao poeta galego José Ángel Valente e ao poeta sirio Adonis, presentadas nun acto que contou coa presenza do alcalde da cidade, Xosé Sánchez Bugallo; do propio Adonis, que se desprazou expresamente dende París, onde vive exiliado; e de Claudio Rodríguez Fer, director da Cátedra Valente de Poesía e Estética.
  • As Jornadas sobre tecnologías y soluciones para la automatización industrial (JAI) recuperarán a presencialidade do 14 ao 18 de novembro nunha edición récord en número de firmas participantes (preto de 125), persoas asistentes rexistradas (2000 entre profesionais e alumnado) e conferencias (45). A 8ª edición das JAI achega ademais novidades no seu programa, con catro mesas redondas.
  • O décimo aniversario do descubrimento do bosón de Higgs será a temática arredor da que xirará a vindeira Nerd Nite, que o mércores 23 de novembro, regresa logo do parón obrigado por mor da pandemia. Rolf Heuer, director xeral do CERN de 2009 a 2015, será un dos relatores que integrarán o programa desta sesión que se artella en base a pequenas charlas científicas onde especialistas dialogan co público das disciplinas que lles apaixonan fóra do ámbito académico, nun ton distendido e en horario nocturno.
  • 'O futuro é galego, e o futuro é en feminino', conclúe a cociñeira Lucía Freitas en 'Superheroínas'. A afirmación podería ser o lema da segunda serie que USC e RAG presentaron na Facultade de Ciencias da Comunicación. A produción audiovisual realizouse no marco do proxecto 'Novas voces para a lingua', que procura outorgar visibilidade e promover o uso cotián do galego entre a mocidade dándolles voz a novos creadores e creadoras.
  • 'A revolución nos oficios tradicionais mediante a innovación' é o título dun ciclo de obradoiros e coloquios que a Uvigo promove neste mes de novembro e que permitirá achegarse, dun xeito diferente, á fabricación artesá de cestas, zocas ou gaitas. Este ciclo está dirixido a dar visibilidade e pór en valor estes oficios tradicionais, pero tamén a pór o foco en como a través da innovación estes traballos mantéñense vixentes no século XXI.
  • O II Encontro Galego de Ciberseguridade reunirá os días 9 e 10 de novembro entidades de referencia no campo da seguridade da información, especialistas na materia, xunto con divulgadores e profesionais. O programa o día 9 pola mañá contará con actividades dirixidas á administración pública, e pola tarde estará centrado no tecido empresarial.
  • O Instituto universitario de física e ciencias aeroespaciais da UVigo segue a dar pasos cara a súa creación. Despois que, a principios destes mes, o Claustro dese luz verde a súa posta en marcha, hoxe foi o Consello de Goberno o que aprobou por asentimento a súa creación, que será remitida á Xunta de Galicia, na procura do visto e prace do Consello Galego de Universidades.
  • Cumieira das Letras. Así bautizou o Departamento de Filoloxía Galega e Latina da UVigo o seu novo proxecto, unha revista de periodicidade anual coa que buscan dar a coñecer traballos científicos en galego sobre a lingua, literatura e cultura galegas. 'Cumieira das Letras Galegas, non leva este apelido no seu nome oficial, pero podería levalo porque ese é o motivo da súa propia existencia, as letras galegas', tal e como explica o seu director, o profesor Alexandre Rodríguez Guerra.